Duke iu rikthyer kredos politike “Shqipëria e para”, presidenti Meta ridoli në një konferencë për shtyp të cilësuar si të “jashtëzakonshme”, ku bëri thirrje që populli të marrë fatet në dorë, pa specifikuar se si, por thënë pse. Sipas tij, po shkelet rëndë Kushtetuta, e vendi po shkon keq e më keq.
“Shqiptarët të hapin sytë, të marrin fatin e tyre në dorë, në mbrojtje të Kushtetutës dhe që fëmijët e tyre të mos ikin më nga sytë këmbët në atdheun e tyre!
Kushtetuta e Republikës është Vija e Kuqe dhe e kuqe flakë, e pakalueshme nga armiqtë e saj dhe të Republikës së gjithë shqiptarëve!
Shqipëria nuk është dhe nuk do të jetë shpresëhumbur!
Presidenti do të jetë në mbrojtje të drejtpërdrejt të Lirive dhe të drejtave themelore të Popullit Shqiptar!”, deklaroi Meta.
Më pas ai përmendi sërish kërkesën për referendum, po pa e përcaktuar se përse, duke iu qasur politikisht përsesë.
“Presidenti do të kërkojë mbështetjen e mbarë popullit shqiptar, që përmes Referendumit të mbrojë Republikën.
Le të jetë populli shqiptar dhe vetëm ai, që do të vendosë nëse pranon të rikthehet në Diktaturë apo do të mbrojë Demokracinë që është fituar me shumë trimëri, vuajtje dhe sakrifica njerëzore.
Vendimi i drejtpërdrejtë i popullit dhe i sovranit të përgjithshëm,është mbi të gjithë.
Referendumi është demokracia direkte dhe në veprim!
Presidenti i Republikës, do bëjë gjithçka që kjo e Drejtë të ushtrohet lirisht dhe pa asnjë pengesë.
Kjo është Detyra ime, për të cilën jam betuar solemnisht dhe me gjithë zemër me dorën mbi Kushtetutën e Republikës së Shqipërisë dhe do ta mbroj, ashtu sikundër dhe jam betuar, deri në fund!
Të mbrojmë sot Kushtetutën dhe përmes saj të ardhmen tonë dhe të fëmijëve tanë!
Shqipëria e Para!”, përfundoi deklarata. /tesheshi.com/
