Aktin e Agur Vrenozit, 53-vjeçarit fieriak që u përlesh me grabitësin e një Exchange, e që humbi jetën nga një plumb, e ka vlerësuar dhe Presidenti Meta. Ishte këshilltari i tij për Pushtetin Lokal, Ylli Asllani, që përcolli mesazhin e kreut të shtetit.
“Në emër të Presidentit Meta i përcolla sot ngushëllimet më të thella, solidaritetin dhe mbështetjen e plotë, familjarëve të qytetarit, Agur Vrenozi, i cili sakrifikoi jetën për të shpëtuar bashkëqytetarët e vet nga përplasja me kriminelët.
Akti i tij sublim, është një gjest i lartë vetëmohimi, një humanizëm i rrallë dhe një shembull i vlerave morale më të arrira të shqiptarëve.
Nëpërmjet këtij shembulli, shoqëria shqiptare tregoi se nuk mund të mposhtet nga krimi.
Shteti shqiptar do të mbështesë dhe do t’i gjendet pranë gjithmonë fëmijëve dhe familjarëve të Agur Vrenozit”, u tha në emër të Presidentit Meta, nga këshilltari i tij. /tesheshi.com/
