Presidenti maqedonas, Gjorge Ivanov refuzon të takojë një tjetër personazh të fortë ndërkombëtar. Bëhet fjalë për zëvendësndihmës sekretarin amerikan të shtetit për Evropën, Hojt Brajan Li. Ky i fundit ka planifikuar të vizitojë Shkupin më 1 maj. Por nga kreu i shtetit i është “përplasur dera”.
“Për shkak të obligimeve të caktuara, paraprakisht, presidenti i shtetit, Gjorgje Ivanov nuk ka mundësi reale që të takojë Hojt Brajan Li”, ka qenë kjo deklarata e dalë nga kabineti i Ivanovit, duke mos dhënë sqarime të mëtejshme.
Kujtojmë muaj më parë, Ivanov bëri të njëjtin gjest me eurokomisionerin për zgjerim Johannes Hahn, duke refuzuar ta takojë po me të njëjtat arsye. E nga ana tjetër i ccoi mesazh që të të takohet me protestuesit maqedonas të cilët janë kundër platformës së partive shqiptare.
Por sot, kreu i shtetit maqedonas i tha televizionit shtetëror hungarez se nuk do e mandatojë qeverinë e Zaevit, duke thënë se më parë duhen mënjanuar pengesat politike dhe juridike.
Sipas tij, problemi politik qëndron në faktin se shumica parlamentare është siguruar nën kërcënim për të pranuar Platformën e Tiranës.
“Kjo sipas Kushtetutës dhe ligjeve tona është vendosje e shtetit në një gjendje nënshtrimi dhe varësie nga një shtet tjetër. Kjo vepër është e dënueshme, por edhe është në kundërshtim me betimin që e kam dhënë gjatë marrjes së funksionit”, ka thënë Ivanov. /tesheshi.com/
