Një vendim i policisë spanjolle për të ndaluar shfaqjen dhe valëvitjen e flamujve që simbolizojnë pavarësinë e Katalonjës në finalen e Kupës së Mbretit këtë të dielë është kthyer në mollë sherri.
Klubi i Barcelonës ka shprehur tërë zemërimin kur ka deklaruar se ndalimi i flamujve “Estelada” është sulm mbi lirinë e shprehjes.
Një njoftim i klubit që sapo ka fituar kampionatin spanjoll vë në pah mospajtimin e plotë me vendimin, duke e parë atë si sulm mbi të drejtën fundamentale të çdo individi për t’i shprehur lirisht dhe pa censurë idetë e opinionet.
Ndërsa zyrtarët spanjollë e arsyetuan vendimin në kuadër të masave të sigurisë për një zhvillim pa incidente të finales në stadiumin “Vicente Calderon”, ka reaguar dhe presidenti i La Ligës, që është shprehur në mbështetje të vendimit.
Javier Tebas ka qenë i drejtpërdrejtë në mbështetjen për ndalimin e flamujve katalanas në finalen e Kupës së Mbretit, duke thënë se ato përfaqësojnë shkatërrimin e Spanjës.
“Duhet të kujtoni se kjo është një ndeshje kupe në Spanjë, dhe flamuri ‘Estelada’ në këto lloj ndeshjesh
përfaqëson shkatërrimin e Spanjës,” ka deklaruar presidenti i La Ligës.
“Nuk ka kuptim të lejohet ai simbol në finalen e Kupës së Mbretit.”
Finalja e Kupës së Mbretit do të luhet në Madrid, në “Vicente Calderon”, aty ku i zhvillon takimet e veta Atletiko e Madridit.
“E respektoj flamurin ‘Estelada’ në rrugë dhe gjatë ndeshjeve të La Ligës, e nuk e konsideroj një problem, por në Kupën e Mbretit është një përplasje me Spanjën,” ka shtuar Javier Tebas.
Në finalen e së dielës do të vihen përballë Barcelona dhe Sevilja. Katalanasit sapo janë shpallur fitues të kampionatit spanjoll, kurse Sevilja ka shkruar historinë me fitimin tre herë radhazi të Ligës së Europës vetëm dy ditë më parë. Kupa e Mbretit është një aktivitet shumë i vlerësuar dhe i respektuar nga ekipet spanjolle. /tesheshi.com/
