Raul Castro nisi sot një vizitë zyrtare në Francë, dhe u prit nën Harkun e Triumfit. Kjo është vizita e parë e tij në Bashkimin Europian që prej marrjes së postit prej të vëllait në 2006-ën. Fidel Castro do ta vizitonte Francën në vitin 1995, e do të takonte presidentin francez të asaj kohe, Francois Mitterrand.
Vizita e Raul Castro-s shihet si një përpjekje për rindërtimin e marrëdhënieve të Kubës me Perëndimin. Castro do të takohet e do të zhvillojë bisedime sot me presidentin Hollande në pallatin presidencial, për të marrë pjesë më pas në një darkë shtetërore të shtruar për nder të tij. Ditën e nesërme ai do të takohet me zyrtarë të ndryshëm francezë.
Presidenti francez e ka përshkruar vizitën si “një fazë të re në forcimin e marrëdhënieve mes dy vendeve”. Hollande do të bënte një vizitë në Kubë në majin e 2015-ës, e cila qe e para e një udhëheqësi perëndimor në më tepër se gjysmë shekulli.
Pas një përmirësimi të dukshëm vitin e shkuar të marrëdhënieve me SHBA-të, Kuba po kërkon të bëjë të njëjtën gjë me fuqitë botërore, dhe Franca po merr një rol udhëheqës në forcimin e lidhjeve politike të Kubës me Europën si një të tërë. /tesheshi.com/
