Që në Serbi ka kohët e fundit mjaft lëvizje centrifugale në lidhje me qëndrimin që duhet të mbajë ky shtet për Kosovën, kjo po shikohet ditë pas dite në debatin politik, i cili thuajse po dominon tërë opinionin publik jo vetëm në Beograd.
Por tashmë ky debat po rrok edhe atmosferën jashtë politikës. Madje mjaft larg saj.
Në një sektor si sporti, i cili gjithashtu ka lidhje me politikën, sidomos në vende si Serbia ku duan ta përdorin si flamur propagandistik po shikohen ndryshime.
Është portali rus Sputnik, që ka sjellë një zhvillim që vjen pikërisht nga Komiteti Olimpik i Serbisë.
Në një intervistë për të përjavshmen “Nedjelnik”, kreu i Komitetit Olimpik të Serbisë, Bozidar Maljkoviç, ka deklaruar se ai nuk mund të zbatonte urdhërin e qeverisë që atletët serbë të largohen nga podiumi i nderit, nëse do të jenë së bashku me sportistët e Kosovës për të tërhequr çmimet.
“Na ka ndoddhur kjo, sidomos në xhudo, ku sportistët tanë janë larguar, por s’mund ta bëjmë më, s’’mund të urdhërojmë sportistët të bëjnë një gjest antisportiv dhe antiolimpik”, tha Maljkoviç.
Ai tregon se Ministria e jashtme serbe u ka bërë namin, pasi në Olimpiadën e fundit të të Rinjve në Gyor ekipi serb nuk zbatoi urdhërin e qendrës.
“Vendimi i qeverisë është një gje dhe ne e zbatojmë atë, pai jemi pjesë e këtij shteti, por më lejoni, nuk mund të lëmë kokrën e namit në një eveniment botëror, ju lutem”, thotë presidenti i Komitetit Olimpik të Serbisë, i cili këtë mendim të tij e ka formalizuar dhe i ka shkruar një letër zyrtare qeverisë.
“I kam shkruar qeverisë që ne nuk do të detyrojmë atletët dhe nuk kemi pse e bëjmë më. Thjesht kjo nuk ka kuptim”, thotë Maljkoviç.
Ndryshim i vogël në dukje por që flet për një hap, apo për atë që Vuçiç e quajti në artikullin e tij si pjesë e një debati publik për ta pranuar një realitet që realisht e ka pranuar gjithë botë, por vetëm Beogradi nuk donte ta dëgjonte.
Kur Edi Rama tha në Beograd që nuk e kuptonte se pse Serbia nuk e njeh Kosovën, kur atë e ka bërë 2/3-at e botës, u duk si heroizëm nga ne dhe blasfemi nga serbët. Por po ta shohësh ftohtë, është thjesht një realitet që në Serbi e kanë kuptuar shumica, por që tani kanë nisur ta diskutojnë institucionet. Të jetë real ky diskutim. Le ta shohim, por gjërat po lëvizin…
Përgatiti: Ylli Pata – /tesheshi.com
