Reuven Rivlin, presidenti i Izraelit, ka patur guximin të shkruajë në një postim në Facebook mbi atë çka ndodhi të premten me një familje palestineze në fshatin Duma në Bregun Perëndimor, duke i dënuar veprimet e ekstremistëve hebrenj.
Rivlin zgjodhi këto fjalë të shkruara në arabisht dhe hebraisht, “Më shumë se turp, unë ndiej dhimbje. Dhimbje për vrasjen e një foshnje. Dhimbje për njerëzit e mi që zgjedhin rrugën e terrorizmit dhe humbin njerëzinë e tyre.”
Duke kërkuar një reagim më të fortë ndaj ekstremistëve të këtillë, presidenti shkroi dhe këto rreshta, “Rruga e tyre nuk është rruga e shtetit të Izraelit, nuk është rruga e popullit hebre. Fatkeqësisht ngjan se deri tani e kemi trajtuar pa ashpërsinë e duhur fenomenin e terrorizmit hebre.”
Kaq ka mjaftuar që mbi fjalët e tij të derdheshin mbi 2000 komente, një pjesë e mirë e të cilave e sulmonin dhe e kërcënonin pa droje presidentin.
“Tradhtar i ndyrë. Fundi yt do të jetë më i keq se i (Ariel) Sharonit,” ishte një koment i cituar nga një gazetë izraelite, i zgjedhur si një shembull i egërsisë me të cilën u përcollën kritikat ndaj presidentit.
Ndërkaq, policia ka nisur një hetim ndaj sulmeve të tilla në median sociale.
Ekstremistë hebrenj sulmuan të premten e shkuar një familje palestineze, duke i vënë flakën shtëpisë së tyre. Nga sulmi mbeti i vdekur një foshnjë tetëmbëdhjetëmuajsh, i quajtur Ali Devabishe, si dhe u plagosën rëndë prindërit e tij dhe i vëllai katër vjeç. /tesheshi.com/
