Një pjesë e politikës maqedonase vijon ta vuajë të ashtuquajturën “Platformë të Tiranës”, pra paktin politik të faktorit shqiptar në Maqedoni, arritur me ndërmjetësimin e Edi Ramës, që çoi më pas në rënien e qeverisë së Gruevskit. Ka qenë Presidenti Ivanov ai që e ka përmendur Platformën e urryer – pasi ka qenë një ndër kundërshtarët e ashpër të saj – gjatë fjalimit vjetor.
“Për shkak të Platformës së Tiranës, kriza politike është rritur në një krizë kushtetuese. Erdhën në dritë shumë mospërputhje të Kushtetutës për dhënien e mandatit për përbërjen e qeverisë. Boshllëkun kushtetues mund ta plotësonim vetëm duke iu referuar Presidencës së presidentit Gligorov nga viti 1992. Mandatin ua besova kur u krijuan kushte ligjore dhe m’u dha garanci në mënyrë të shkruar. Prandaj, vendimet e mia i marr në përputhje me ato garanci për mbrojtjen e unitetit, sovranitetit, integritetit territorial, pavarësisë dhe multietnicitetit të Republikës së Maqedonisë”, tha Ivanov.
Po ashtu, Platformën e famshme, ai e përfshiu dhe në kritikat e tij me temë populizmin në rritje në rajon.
“E përmenda Platformën e Tiranës e cila ishte ndërhyrje populiste në punët e brendshme të Republikës së Maqedonisë”, theksoi presidenti maqedonas, duke rezervuar kritika dhe ndaj Prishtinës zyrtare, lidhur me çështjen “Kumanova”.
“Qeveria e Kosovës vendosi të përcaktojë ndihmë financiare për aktorët e angazhuar në aktet e dhunshme dhe terroriste në Goshincë dhe Kumanovë. A kështu qeveria e Kosovës e shpreh falënderimin për kujdesjen e mbi 350.000 refugjatëve kosovarë në vitin 1999, njohjen e Kosovvës, dhe përfshirjen e Kosovës në bashkëpunimin rajonal?”, u shpreh Ivanov. /tesheshi.com/
