Presidenti i Maqedonisë, Gjeorgje Ivanov nuk ka pranuar që t’i japë mandat qeverisës liderit të LSDM-së, Zoran Zaev, mu për shkak të pranimit prej këtij të fundit të kushteve të Platformës Shqiptare, gatuar në zyrën e kryeministrit Rama.
“Nuk ka mandat për asnjë njeri dhe parti që pranon Platforma të gatuara në shtetet e huaja dhe që cenojnë integritetin e shtetit tonë”, kështu është shprehur presidenti i shtetit në Maqedoni, Gjorgje Ivanov në një konferencë për shtyp ku pritej t’i dorëzohet mandati për formimin e qeverisë së re kreut të LSDM-së, Zoran Zaev.
Sipas tij, qytetarët nuk kanë votuar për Platforma postzgjedhore të një etnikumi, por kanë zgjedhur platformat partiake.
“Derisa të jetë Ivanov në postin e presidentit të shtetit”, siç tha ai, asnjëherë nuk do të lejojë që të shkelet sovraniteti shtetëror”.
Po ashtu, Ivanov tha se pranimi i Platformës së përbashkët të partive shqiptare paraqet vepër penale në formën e paraqitur, duke e paralajmëruar liderin e LSDM-së, që të tërhiqet nga ëndërra për t’u bërë kryeministër me kushtin e pranimit të kësaj platforme.
Ivanov kishte edhe një porosi për faktorin ndërkombëtar, me ç’rast kërkoj nga ata nëse nuk e dënojnë tentativën e dikujt për t’i cenuar interesat shtetërore, atëherë mos të imponojnë çfarëdo zgjidhje për Maqedoninë.
Tashmë, kriza maqedonase ka marrë një tjetër përmasë. Si zgjidhje duket vetëm shkuarja sërish në zgjedhje të parakohshme. Por dhe ashtu, sido që të dalë rezultati, nevoja për faktorin shqiptar mbetet e paevitueshme, që do të thotë se Platforma do jetë sërish kusht. M.Krasniqi – /tesheshi.com/
