Presidenti i Bashkimit Europian, Donald Tusk, deklaroi pas një takimi në Tiranë me kryeministrin Edi Rama se shqiptarët duhet të kenë kujdes me regjimin pa viza, pasi Brukseli do të vendosë kontroll më të rreptë.
Edhe pse nuk u tha publikisht, ashtu siç mësohet, qytetarët të cilët do të udhëtojnë për në shtetet e BE-së nuk do të lejohen që në Rinas nëse nuk japin arsye dhe argumente të forta se kanë për t’i zbatuar afatet.
Ndërkaq, Tusk ka kërkuar miratimin e shpejtë të reformës në drejtësi.
“Kemi rënë dakord me kryeministrin Rama për rëndësinë e mbështetjes ndërpartiake për t’i përfunduar sa më shpejt reformat e rëndësishme që do t’i hapin rrugën Shqipërisë drejt çeljes së negociatave të anëtarësimit për në BE,” tha Presidenti i BE-së, që pas Tiranës viziton Maqedoninë.
“E kemi të qartë se fjala kyçe është reforma në drejtësi. E kam falënderuar presidentin Tusk për mbështetjen që na jep në këtë reformë Europa dhe SHBA-ja. Kam besim se me këtë mbështetje do të kalojmë një reformë që do të jetë historike për transformimin e sistemit të drejtësisë në vend,” ka deklaruar kryeministri Edi Rama.
Në lidhje me krizën e refugjatëve, kreu i qeverisë theksoi se edhe pse Shqipëria nuk është e prekur prej saj, qëndrimi është i qartë: ndihma për zbutjen e efekteve të krizës.
“Nuk jemi europianë vetëm për ditë të mira, por edhe për ditë të këqija. Jemi të vendosur të jemi pjesë e çdo plani për zbutjen e efekteve të kësaj krize,” u shpreh Rama. /tesheshi.com/
