“Shkupi dhe Tirana po minojnë, me veprimet e tyre politike, ecurinë e tyre europiane. Njëri fqinj duke përdorur një emër që përcjell irredentizmin dhe fqinji tjetër duke shkelur të drejtat themelore të njeriut dhe në veçanti të pronës”.
Kështu raportohet nga mediat të ketë deklaruar presidenti grek Prokopis Pavlopoulos në një darkë të shtruar në nder të homologut të tij francez, Emmanuel Macron, gjatë vizitës në Athinë.
Në rastin e Shqipërisë, duket se presidenti grek ka reaguar në lidhje me pronat e minoritetit grek në Himarë, ku pak ditë më parë është miratuar plani rregullues i bashkisë, në të cilin parashikohet edhe prishja e disa ndërtimeve.
Omonia kundërshtoi miratimin e planit rregullues, madje duke bllokuar edhe zhvillimin normal të mbledhjes. Kjo detyroi autoritetet lokale që të zhvendoseshin në një tjetër godinë dhe nën mbrojtjen e policisë, të miratohej plani.
Pas miratimit të tij, reagoi Athina zyrtare që paralajmëroi Shqipërinë në lidhje me proçesin e integrimit të BE. Të njëjtën gjë duket se ka bërë edhe presidenti grek, sipas të cilit Shqipëria duhet të gjejë vendin e saj në BE, por duke respektuar të drejtat europiane, ku një nga shyllat kryesore janë ato të njeriut. Në këtë kuadër, duke iu referuar çështjes së pronave, Pavlopoulos tha se Greqia nuk mund të mbështesë Shqipërinë kur nuk respekton këto të drejta.
Por deklaratat e bëra nga autoritetet greke, nuk janë marrë aq seriozisht nga zyrtarë të BE-së, të cilët edhe kur janë pyetur nga eurodeputetë grekë, kanë deklaruar se nuk kanë informacione bindëse në lidhje me atë çka pretendohet. Për çështjen e pronave, Brukseli i referohet gjetjeve në raportin e tij, që flet mbi problematikën në tërësi që ka me pronat në Shqipëri duke filluar me regjistrimin e tyre, më pas kthimin dhe kompensimin. /tesheshi.com/
