Presidenti i Greqisë, konservatori Propopis Pavlopulos, ka reaguar egër pas përmendjes së problemit të popullsisë çame në marrëveshjen mes Tiranës dhe Athinës.
Pavlopulos ka deklaruar se është e pakonceptueshme që udhëheqja e Shqipërisë të ngrejë çështje çame, pasi sipas tij nuk ekziston.
Kreu i shtetit grek ka kërcënuar Shqipërinë duke deklaruar se nëse dëshiron integrimin në BE të harrojë çështjen çame.
Ai ka shtuar se respekti për historinë është baza ndërkombëtare për miqësinë dhe fqinjësinë e mirë.
“Më vjen keq që jam i drejtpërdrejtë, por ata guxojnë të flasin për çame. Më mirë të mos kujtojmë historinë e atyre që u shfaqën si çamë në hapësirën greke.
Është e pakonceptueshme që udhëheqja e Shqipërisë të ngrejë çështje çame. Kjo çështje nuk ekziston. Eshtë më mirë që Shqipëria të mos kujtojë se çfarë do të thotë historia e të ashtuquajturave çamë gjatë periudhës së mizorive naziste në Greqi, nëse dëshiron të ketë ndonjë perspektivë evropiane”, u shpreh ai.
Athina po bën presion edhe pas qëndrimit të komisionerit të Zgjerimit të BE-së, Johannes Hahn, i cili para një viti foli për nevojën e një djalogu mes Tiranës dhe Athinës për çështjen çame.
Kryeministri Edi Rama tha në një intevistë televizive se çështja çame është çështje e shqiptarëve që kërkojnë të drejtat e tyre në Greqi.
Sipas Ramës, kur të hiqet ligji i luftës mes dy vendeve, pritet që të zhbllokohen pronat e konfiskuara nga shteti grek.
Ndërkohë që do të lejohen të vizitojnë vendet e të parëve, pjesëtarët e familjeve që u dëbuan gjatë Luftës së Dytë Botërore.
Çështja çame është kthyer në qendër të debatit mes dy vendeve pas bisedimeve mes Shqipërisë dhe Greqisë në nivelin e ministrave të Jashtëm në Kretë dhe në Korçë, pak javë më parë. E ndërsa pala shqiptare thotë është diskutuar edhe për çështjen çame në tryezë, grekët e mohojnë kategorikisht, madje edhe ekzistencën e një çështje të tillë. /tesheshi.com/
