Greqia vazhdon të përcjellë mesazhe kërcënuese ndaj Shqipërisë, lidhur me aspiratat integruese të vendit tonë në BE.
Presidenti i Greqisë, Prokopis Pavlopoulos, ashtu si dhe kreu i diplomacisë greke, ka sjellë në vëmendje prishjen e disa ndërtimeve në zonën e Himarës, në kuadër të planit rregullues të kësaj bashkie.
Në një intervistë për të përditshmen serbe “Politica”, Pavlopoulos thotë se veprimet e autoriteteve shqiptare që shkelin të drejtat themelore të njeriut, pengojnë rrugën drejt anëtarësimit në Bashkimin Europian.
“Kur bëjnë akte që bien në kundërshtim me konventat europiane, të tilla si shkelja brutale e të drejtave themelore të njeriut, në veçanti ajo e pronës, minon perspektivën europiane”, tha Presidenti grek.
Greqia ka disa javë që ka paralajmëruar Tiranën zyrtare në lidhje me bllokimin që mund t´i bëjë hapjes së negociatave mes Shqipërisë dhe BE, duke nxjerrë si shkak mosrespektimin e të drejtave të minoritetit grek.
Për çështjet e pronave, eurodeputetët grekë kanë ngritur shqetësimin edhe në Parlamentin Europian. /tesheshi.com/
