Presidenti gjerman Frank-Walter Steinmeier, gjatë një ceremonie në qytetin polak të Bialystokut, aty ku bombat e para ranë 80 vjet më parë në Luftën e Dytë Botërore, i ka kërkuar falje Polonisë për konfliktin më të përgjakshëm në histori.
“Unë përkulem përpara viktimave të sulmit. Unë përkulem kokën përpara viktimave polake të tiranisë gjermane dhe kërkoj falje”, tha Steinmeier në polonisht dhe gjermanisht.
Ai theksoi se gjermanët kishin kryer krime kundër njerëzimit në Poloni.
Steinmeier e tha këtë në përgjigje të pozicionit të të djathtëve gjermanë, udhëheqësi i të cilëve, Alexander Gauland e përshkroi Rajhun e Tretë si një gjë e vogël në lidhje me historinë ndryshe madhështore gjermane.
“Ne kurrë nuk do të harrojmë. Ne do të kujtojmë gjithmonë”, tha Steinmeier.
Presidenti polak Andrzej Duda tha se sulmi i Gjermanisë naziste ndaj Polonisë ishte një “veprim egërsie” dhe një “krim lufte”.
Bombardimi i Polonisë erdhi shtatë ditë më vonë pasi Gjermania dhe Bashkimi Sovjetik i atëhershëm arritën një marrëveshje të fshehtë për ndarjen e Evropës Lindore, të quajtur Marrëveshja Molotov-Ribentrop.
Edhe pse kanë kaluar 80 vjet nga shpërthimi i luftës, Polonia beson se ka ende çështje të pazgjidhura, përfshirë dëmshpërblimet e luftës që Varshava po i kërkon Berlinit.
Pas sulmeve të Hitlerit ndaj Polonisë, Britania dhe Franca i shpallën luftë Gjermanisë naziste.
Polonia humbi gjashtë milion banorë në Luftën e Dytë Botërore, përfshirë rreth tre milion hebrenj. /tesheshi.com/
