Francois Hollande ka treguar sot se firmat private të sigurisë kanë marrë një personel shtesë prej 3.000 personash për Kampionatin Europian të futbollit që do të zhvillohet gjatë muajve qershor-korrik.
Pas ngjarjeve të nëntorit në Paris, e atyre të pak ditëve më herët në Bruksel, është vënë në diskutim dhe zhvillimi i aktivitetit më të rëndësishëm europian të futbollit. Fillimisht është sugjeruar që ai të luhet me dyer të mbyllura, por më pas është garantuar nga organet përkatëse se gjithçka do të shkojë sipas parashikimeve, pra, nuk do të ketë ndryshime të karakterit të tillë si lënia e sportdashësve jashtë stadiumeve.
Presidenti francez deklaroi se ndeshjet në dhjetë qytete franceze priten t’i ndjekin 2.5 milionë njerëz, ndërsa pesë milionë të tjerë mendohet se do t’i shohin ato në hapësirat e hapura jashtë stadiumeve.
Ndërsa shqetësimi më i madh është rreziku për akte terroriste, Hollande ka nënvizuar në një fjalim të mbajtur sot se, “ne duhet të tregojmë se sporti, ashtu si kultura, si mënyra jonë e jetesës, nuk i dorëzohet këtij presioni, këtij kërcënimi”.
Euro 2016 nis më 10 qershor, e zgjat një muaj, për të përfunduar më 10 korrik. /tesheshi.com/
