Rodrigo Duterte ka shprehur dje zemërimin për komentet e të dërguarit amerikan në Azi se retorika e tij e ashpër dhe lufta kundër krimit ishin lajme të këqija për biznesin.
Në përgjigje të kritikave të ndihmëssekretarit amerikan të Shtetit, Daniel Russel, presidenti i Filipineve ka deklaruar para nisjes për në Japoni: “Këta amerikanët janë vërtet të çmendur. Ata mendojnë se janë dikush. Russel thotë, ‘Komentet e Duterte-s sjellin shqetësim në komunitetet e biznesit.’ Atëherë mblidhin plaçkat dhe largohuni. Ne do të mëkëmbemi, ju garantoj.”
Duterte u shpreh se është kundër pranisë së trupave të huaja në vendin e tij, e se amerikanët duhet ta harrojnë një marrëveshje ushtarake nëse ai do të vazhdojë të jetë në pushtet.
SHBA-të nuk duhet t’i trajtojnë Filipinet si “një qen me zinxhir”, tha Duterte ndërsa bënte gati të nisej për në Japoni.
“Pres kohën kur nuk do të shoh më ushtar apo trupa ushtarake në vend veç ushtarëve filipinas.”
“Vijimi i deklaratave dhe komenteve polemike, dhe një klimë e njëmendtë pasigurie mbi qëllimet e Filipineve, kanë sjellë shtangie në një numër vendesh,” tha të hënën i dërguari amerikan, Daniel Russel, pas takimit me sekretarin e Jashtëm të Filipineve, Perfecto Yasay. /tesheshi.com/
