Rodrigo Duterte ka kërcënuar një ditë më parë se vendi i tij mund të largohet nga OKB-ja, pas kritikave të Kombeve të Bashkuara për vrasjet pa gjyq në luftën kundër drogës dhe për vendosjen e rendit.
Presidenti i Filipineve ka deklaruar se detyra e tij është mbrojtja e qytetarëve që i binden ligjit, e jo e kriminelëve.
“Detyra ime si president është të mbroj qytetarët që e respektojnë ligjin. Nuk jam ngarkuar kurrë nga ndonjë ligj për t’i mbrojtur kriminelët.”
Me betimin e tij më 30 qershor, pas një fitoreje dërrmuese në zgjedhjet presidenciale, Duterte nisi një fushatë kundër drogës e përdoruesve të saj, si edhe u zotua t’i jepte fund kriminalitetit në vend brenda gjashtë muajve.
Por OKB-ja dhe një numër organizatash të të drejtave të njeriut ka ngritur shqetësimin për vrasjet pa gjyq të përdoruesve e të trafikuesve të drogës.
Duterte tha dje se do t’ia tregojë OKB-së statistikat e fushatës së tij, e se do t’ia provojë rëndësinë e mbrojtjes së filipinasve të pafajshëm.
“Kam për t’i shpjeguar vrasjet pa gjyq, nëse doni. Urdhrat e mia janë që policia të dalë e të vihet në gjurmë të kriminelëve. U them atyre t’i arrestojnë nëse dorëzohen paqësisht, por t’i vrasin nëse bëjnë rezistencë të dhunshme. Unë mbaj përgjegjësi të plotë për çfarë ngjet.”
“Na nxirrni nga organizata juaj. Ju sidoqoftë nuk keni bërë asgjë,” do të thoshte ai për OKB-në.
Presidenti i Filipineve u ka kërkuar gjithashtu përfaqësuesve të OKB-së që të jenë gati për pyetjet e tij, teksa i ka kritikuar Kombet e Bashkuara për pasivitet në konfliktet globale, si në Siri. /tesheshi.com/
