Presidenti i Filipineve, Rodrigo Duterte, kritikoi Agnes Callamad, raportuesen speciale të OKB-së, e cila kërkoi nga qeveria filipinase që vdekja e studentit 17 vjeçar të ishte e fundit në fushatën e nisur kundër trafikantëve të drogës.
“Tregojini asaj, mos më kërcënojë mua. Nga vjen ajo? Është vetëm një budallaçkë”, tha Duterte duke iu përgjigjur raportueses speciale të OKB-së, e cila ka kritikuar në mënyrë të vazhdueshme luftën brutale të Dutertes kundër drogës dhe ka shprehur shqetësim për rastet në rritje të vrasjeve pa gjyq në Filipine.
Duke iu përgjigjur thirrjes së Callamadit, Duterte tha se vrasjet e lidhura me drogën ndodhin kudo, duke përfshirë Francën, si dhe shtoi se “Filipinet nuk janë nën juridiksionin francez”.
“Frëngjisht? Lëreni të shkojë në shtëpi atje ku arrestohet një person pothuajse për një kohë të pacaktuar nga ligji francez. Dhe, ligji francez thotë se je fajtor, duhet të provosh pafajësinë tënde. Këtu, supozimi është që ju jeni të pafajshëm”, tha Duterte.
Vrasja e studentit Kian Loyd Delos Santos, më 17 gusht të këtij viti, shkaktoi zemërim mbarëkombëtar, pasi u tërhoq nga zyrtarët policorë në një rrugicë në Manila dhe u qëllua në kokë.
Në procesionin e tij të funeralit morën pjesë mbi një mijë njerëz.
Lufta agresive e administratës ndaj drogës, e cila ka rezultuar në mijëra vrasje, është dënuar nga avokatë të ndryshëm të të drejtave të njeriut jo vetëm nga vendi, por edhe nga jashtë.
“Nëse ai reziston dhe është i dhunshëm, ju jeni të lirë të vrisni idiotët”
Presidenti Duterte, ditën e djeshme, pasi e nderoi me një medalje shtetërore, i tha inspektorit të policisë, Jovie Espenido, se ai “ishte i lirë të vriste idiotët” që i rezistojnë arrestimit.
“Detyra juaj kërkon që të mposhtni rezistencën e personit që po arrestoni. Nëse ai reziston dhe është i dhunshëm, ju jeni të lirë të vrisni idiotët. Ky është urdhri im për ju”, i tha Duterte, oficerit.
Espenido aktualisht është shefi i policisë në qytetin jugor filipinas, Ozamiz, ku ai në muajin korrik udhëhoqi operacionet kundër drogës që çuan në vrasjen e kryetarit të bashkisë, si dhe 14 të dyshuarve të tjerë, përfshirë edhe gruan e tij, si dhe rezultoi me burgimin e vajzës së kryebashkiakut dhe djalit të tij.
Përveç kësaj, nën vëzhgimin e Espenido-s, nëntorin e kaluar u arrestua edhe kryetari i bashkisë Albuera, i dyshuar për trafikun e drogës, i cili më vonë u vra nga një shpërthim brenda një burgu provincial. /tesheshi.com/
