Gianni Infantino, presidenti i FIFA-s, ka folur për Sky Sport Italia-n, duke u treguar dorëlëshuar në lavdërimet për Jose Mourinho-n, portugezin që tani drejton Mançester Junajtedin.
Sipas tij, futbolli do të qe një sport më i varfër pa personalitete të tilla si tekniku portugez.
“Mourinho është një njeri që ka kontribuar dhe do të vazhdojë të kontribuojë shumë për futbollin me idetë dhe me mënyrën e tij të të bërit të gjërave.”
I vetëquajturi “speciali” ka bërë gjatë karrierës shumë kundërshtarë me sjelljen e me deklaratat e tij, por ja ç’mendon Infantino për këtë:
“Qartësisht, ju e doni ose e urreni atë, dhe unë i përkas kategorisë së parë. Ne kemi nevojë për njerëz si ai në lojë, novatorë që thonë atë që mendojnë dhe nuk e vrasin mendjen gjithmonë për të qenë diplomatikë.”
Mourinho nuk është se po kalon momente të lumtura në detyrën e disatë në futbollin anglez, me Mançester Junajtedin e tij që nuk ka të ndalur në luhatjet tashmë të zakonshme në lojë e rezultat.
Megjithatë, Infantino thotë: “Ne kemi nevojë për kësi lloj njerëzish në futboll, dhe Mourinho është midis personaliteteve më të mëdha. Ai është një legjendë e këtij sporti.” /tesheshi.com/
