Përkundër një mandati të lodhshëm, vështirësive ekonomike dhe zhvlerësimit të lirës, prodhuar nga një sërë faktorësh, nga pezullimi i jetës në pandemi te ndërhyrja e jashtme në sektorin financiar dhe kriza bashkëshoqëruese me përplasjen ruso-ukrainase, tërmeteve apokaliptike në shkurtin e këtij viti dhe një fronti mediatik ndërkombëtar, presidenti turk i ka fituar në mënyrë bindëse zgjedhjet më kritike në erën e re të lulëzimit të Turqisë.
Me rreth 2.5 milionë vota më tepër se kundërshtari i tij kryesor, Kemal Kılıçdaroğlu, dhe fare pak nën 50%, Recep Tayyip Erdoğan është fitues i padiskutueshëm i zgjedhjeve të 14 majit. Diferenca me thuajse 5 pikë me rivalin e bllokut të gjashtë partive (dhe një të shtate të paformalizuar) është tregues i qartë i tendencës së votës. Sigurisht që sistemi nuk do ta lejojë atë të festojë plotësisht, duke e lënë betejën të hapur dhe për dy javë të tjera.
Me energji të pashtershme pas një dite sfilitëse të çuar mes Stambollit dhe Ankarasë, fjala e tij tradicionale për mbështetësit nga ballkoni i selisë qendrore të AKP-së në kryeqytetin turk, mbrëmë, dy orë pas mesnatës, përçoi entuziazëm dhe bindje për fitoren nëse do të shkohej në balotazh.
Can anyone translate for me this song that #Erdogan is signing at #AKP headquarters after the unofficial count was released showing he’s leading with real margin? This footage must become part of the State’s archives. #Turkey decides. #TurkeyElections
— Maxamed Garaad 🇵🇸 (@SomaliIntegrity) May 14, 2023
Paralel me zgjedhjet presidenciale, ato parlamentare e dhanë verdiktin e tyre, duke nxjerrë fituese AKP-në dhe bashkëpunëtorët e saj, nacionalistët e MHP-së. Koalicioni i kryesuar nga Erdoğan-i mori gjysmën e votave të turqve dhe garantoi shumicën parlamentare përballë të majtëve të CHP-së dhe të bashkuarve me ta përkundër dallimeve ideologjike.
Cumhur İttifakı ka siguruar mbi 49% të votave, 15 për qind më tepër se Millet İttifakı. Si parti më vete, AKP kryeson me mbi 35 për qind. Ndryshe pritshmërive, CHP nuk u ka shtuar asgjë votave të veta, ende notuese në 25%.
Turqinë e presin katërmbëdhjetë ditë fushatë, mbushur me tension. Përballë problemeve të shumta që kërkojnë zgjidhje, turqit duhet të ritregojnë sërish maturi dhe pjekuri në kutitë e votimit. /tesheshi.com/
