Presidenti Meta ka shfrytëzuar urimin e tij kortezial për ditën e parë të shkollës, duke përcjellë drejtpërdrejt ose me nëntekst, mesazhe të pastra politike, në rolin e një udhëheqësi opozite të kamufluar në pozitën që gëzon, atë të kreut të shtetit.
Ai ka kërkuar rikthimin e një “Dhjetori ‘90”, gjithnjë në kuadër të një beteje me Ramën, një prej thirrjeve të herëpashershme në zjarrmimin e tij politik me mazhorancën, qyshse LSI-ja e tij mbeti pa pushtet pas zgjedhjeve të katër viteve më parë.
“Jam shumë i shqetësuar që pjesa dërrmuese e të rinjve tanë, veçanërisht studentët, ende dëshirojnë të largohen nga vendi. Ne duhet ta dekurajojmë si shoqëri largimin e trurit dhe të forcave të reja më krijuese të shoqërisë, duke u ofruar të rinjve tanë më shumë shpresë e alternativa edukimi dhe pune.
Fenomeni thellësisht shqetësues i shpopullimit, është një emergjencë kombëtare, që ka ndikuar drejtpërdrejt edhe në sektorin e arsimit, me ulje të numrit të nxënësve në shkolla dhe plakje të popullsisë.
Është koha jo vetëm të mendojmë seriozisht, por edhe të reagojmë fuqimisht për të mbrojtur të ardhmen tonë nga ky erozion i tmerrshëm social, vlerash dhe besimi. Jam i bindur se rinia do të na udhëheqë në këtë proces, ashtu si 30 vite më parë!”, shkruan njeriu që është në presidencë në rolin e kreut të shtetit.
Ai më tej sulmon dhe Ministrinë e Arsimit, duke pretenduar se masat e kësaj të fundit anti-COVID janë propagandë.
“Shpresoj që qeveria dhe Ministria e Arsimit, përtej propagandës, të kenë marrë të gjitha masat për të garantuar një proces normal mësimor, pa pasoja në përkeqësimin e mëtejshëm të situatës vërtet shqetësuese”, shkruan ndër të tjera Meta. /tesheshi.com/
