Milos Zeman, presidenti polemizues i Çekisë, i spikatur për qëndrimin e tij të ashpër ndaj refugjatëve të dyndur në kufijtë e Europës, nuk i ka kursyer ata as në mesazhin për Krishtlindjet.
“Jam thellësisht i bindur se ne po përballemi me një invazion të organizuar, e jo me një lëvizje spontane refugjatësh,” ka thënë pa droje ai.
Zeman ka bërë një krahasim mes refugjatëve dhe çekëve që e lanë vendin gjatë pushtimit nazist. Sipas tij, çekët kërkuan të “luftojnë për të çliruar vendin, e jo të marrin përfitime sociale në Britaninë e Madhe”. Ndryshe tyre, në këndvështrimin e Zeman-it, “Një pjesë e madhe e emigrantëve ilegalë janë të rinj, të shëndetshëm e beqarë. Vras mendjen pse këta njerëz nuk marrin armët për të shkuar për të luftuar kundër Shtetit Islam për lirinë e vendeve të tyre.”
Dhembshuria ishte e mundur për refugjatët pleq, të sëmurë apo fëmijë, por jo për të rinjtë që duhet të kthehen për të luftuar kundër ekstremistëve, ka mendimin Milos Zeman-i.
Presidenti çek njihet botërisht për qëndrimin e tij kundër emigrantëve. Qasja e tij do ta vinte në nëntor krah për krah me ekstremistët e djathtë në një manifestim në Pragë kundër Islamit.
Interesant ka qenë reagimi i kryeministrit të vendit, Bohuslav Sobotka, ndaj fjalëve djegëse të kryetarit të shtetit çek, duke i cilësuar ato të mbështetura “në paragjykime dhe në thjeshtëzimin e tij të zakonshëm të gjërave”. /tesheshi.com/
