Milos Zeman, i njohur për qëndrimet e tij të debatueshme, ka kërkuar nën shembullin e Britanisë që edhe Çekia të mbajë një referendum për anëtarësinë në BE dhe në NATO.
“Nuk pajtohem me ata që janë për lënien e Bashkimit Europian,” raportohet të ketë thënë presidenti çek në një takim me qytetarët e vendit të tij në një provincë, “por kam për të bërë gjithçka që ata të kenë një referendum dhe të jenë në gjendje të shprehen. E njëjta gjë vlen dhe për daljen nga NATO-ja.”
I menjëhershëm ka qenë reagimi i qeverisë çeke ndaj presidentit të vendit, duke e hedhur poshtë pa lëkundje propozimin.
“Qeveria nuk po ndërmerr ndonjë hap që do të vinte në diskutim anëtarësinë tonë dhe orientimin afatgjatë të politikës së jashtme të Republikës Çeke. Prandaj ajo nuk po parashikon asnjë referendum,” ka thënë përmes një deklarate zëdhënësi i kryeministrit.
“Anëtarësia në këto organizata është një garanci për stabilitetin dhe sigurinë,” ka vijuar ai.
Zeman ka spikatur në muajt e fundit me gjuhën jo fort diplomatike dhe me mungesën e hapur të vullnetit për të pranuar në Çeki emigrantë gjatë krizës së refugjatëve, posaçërisht të atyre muslimanë, që u ikin konflikteve në Lindjen e Mesme e më gjerë.
Një figurë shumë polemizuese, Milos Zeman pret të rivotohet përsëri dy vite më pas, ndërsa në 2013-tën u bë presidenti i parë çek i zgjedhur në mënyrë të drejtpërdrejtë. /tesheshi.com/
