Milos Zeman, presidenti i Çekisë, i njohur për deklaratat e tij polemizuese dhe për qëndrimin tërësisht kundër emigracionit, ka çuditur sërish, teksa ka deklaruar se vala e refugjatëve është vepër e Vëllazërisë Muslimane.
Zeman ka folur për radion shtetërore çeke, duke pretenduar se e ka marrë informacionin për çka po flet nga muslimanë dhe nga politikanë të spikatur arabë.
“Besoj se ky pushtim është organizuar nga Vëllazëria Muslimane, duke përdorur mjete financiare nga një numër shtetesh,” është shprehur ai në lidhje me valën e mbi një milionë refugjatëve që kanë gjetur strehë në Europë.
Ai nuk është ndalur me kaq, për ta çuar më tej idenë e tij, “Vëllazëria Muslimane nuk mund të nisë një luftë kundër Europës, nuk e ka fuqinë, por mund të përgatisë një valë në rritje emigrante dhe të kontrollojë dalëngadalë Europën.”
Shtetari më i lartë i Çekisë e ka shpjeguar krizën e refugjatëve me dy arsye, me qëndrimin e gjindshëm të Europës ndaj emigrantëve, e me përpjekjet e Vëllazërisë për të përmbushur objektivat e saj.
“Pushtim të organizuar” e quajti ai në ditët e fundit të vitit të shkuar vërshimin e refugjatëve, ndërsa më herët është bërë pjesë dhe e manifestimeve të ekstremistëve të djathtë. /tesheshi.com/
