Presidenti azer Ilham Aliyev akuzoi rëndë armenët, rivalët e tyre për Nago Karabakun, për të cilin kanë bërë disa luftra, më e fundit një vit më parë, duke e rimarrë këtë territor që e humbën pas 90-ës, me rënien e Bashkimit Sovjetik, pjesë e së cilit ishin që të dy.
Nga Tirana ku ai po zhvillon të parën vizitë zyrtare, Aliyev tha se “marrja e 20 përqind të territorit azerbajxhanas ishte një krim, një vendosje e paligjshme në territorin azerbajxhanas”, lidhur me atë që ndodhi tre dekada më parë.
“Këto toka ishin bërë të pajeta. Nga 67 xhami, 65 janë shkatërruar. Dhe aty kanë mbajtur kafshë dhe kjo ka lënduar ndjenjat e popullit azerbajxhanas. Ne duhet të vendosnim drejtësi dhe tashmë flamuri azerbajxhanas valëvitet në këto toka dhe jeta po kthehet aty. Natyrisht për njerëzit tanë, vendin tonë, është edhe mbështetja e vendit tuaj për ne. Iu jam vërtet mirënjohës për këtë mbështetje”, iu drejtua ai politikës zyrtare të Shqipërisë.
“Ne e vlerësojmë fort këtë mbështetje. Qoftë në fazën e pushtimit e po kështu edhe gjatë fazës së luftës në Nagorno-Karabak, që si rezultat pati çlirimin e tokave të të parëve tanë dhe vendosjen e të drejtave ndërkombëtare. Ju referuat rezolutat e OKB-së. Më duhet të them që ato janë miratuar prej 27 vitesh, por nuk janë zbatuar. Armenia nuk i ka zbatuar kurrë, në fakt i ka shpërfillur ato dhe komuniteti ndërkombëtar thjesht ka mbyllur sytë ndaj kësaj”, tha Aliyev.
Ndërsa në planin ekonomik, presidenti azer përmendi gazin që sipas tij është vendimtar për Europën, atë i cili kalon dhe nga Shqipëria. “Gazi i Azerbajxhanit po kontribuon në sigurinë energjitike të Europës. Deri në 2027 kemi planin të dyfishojmë furnizimin me gaz për Europën, sigurisht ky gaz do të kalojë përmes Shqipërisë.
Depozitat tona janë shumë të pasura, aktualisht TAP dhe TANAP mund të diskutohet për të rritur kapacitetet e tyre”, tha ndër të tjera Aliyev. /tesheshi.com/
