Sarah Palin mbështet për president të Shteteve të Bashkuara, Donald Trump, duke u bërë kështu i pari zë nga zyrtarët apo ish-zyrtarët amerikanë që dalin në krah të miliarderit për Shtëpinë e Bardhë.
Kandidatja për zëvendëspresidente të Shteteve të Bashkuara e shpalli mbështetjen e saj në një takim që u zhvillua në një hangar të ngrohtë në kampusin universitar në Iowa.
Në skenë, Trump, si thonë mediat ndërkombëtare, iu referua të dhënave të sondazheve dhe ngriti në qiell mbështetjen që ka mes votuesve republikanë e kjo për gati 25 minuta. Pas kësaj, ai paraqiti atë që e cilësoi “një person të jashtëzakonshëm, me një bashkëshort të pabesueshëm dhe me një familje të pabesueshme”: Sarah Palin.
Në fjalimin e saj 20 minutësh, Palin vlerësoi Trump dhe shprehu dëshirën e saj për “ta bërë sërish të madhe Amerikën”, duke shfrytëzuar mundësinë për një sulm pa cak dhe konfuz mbi të dyja partitë politike. Ajo dënoi politikën e jashtme të presidentit Obama dhe marrëveshjen me Iranin dhe shkoi më tej duke thënë se nën administratën aktuale “ne vetëm kërkojmë falje dhe i themi falemnderit armiqve”.
Në vend të kësaj, sipas Palin, “duhet që luftëtarët tanë të bëjnë punën e tyre dhe të shkelmojnë ISIS”.
Por, rëndësia që merr mbështetja e Palin, kandidate për numrin dy të Shtëpisë së Bardhë në vitin 2008, shtrihet më shumë në të qënit një figurë e famshme sesa në postin zyrtar që mbante dikur.
Dalja e Palin në politikë si një personazh konservator dhe i famshëm paraprin atë të Trump. Palin u shndërrua në një superstar të politikës brenda natës, pas përzgjedhjes nga John McCain si kandidate për zëvendëspresidente.
Retorika e saj populiste e popullore e bëri atë të dashur në të djathtë ndërsa mungesa e dijenive në politikë shtangu një pjesë të mirë të politikbërësve.
Marrëdhënia e “çiftit” Palin-Trump daton në vitin 2011 kur të dy ndanë nga një copë pice në Times Square. Që në atë kohë, të dy flirtonin publikisht me kandidimin për presidencialet.
Prej asaj kohe, Trump shpesh e ngre lart figurën e Palin në public, madje ai ka lënë të kuptohet për një rol të saj në administratën e mundshme Trump. “Ajo është vërtet një person i veçantë dhe mendoj se njerëzit e dinë këtë”, tha Trump.
Pavarësisht se mediat thonë se mbështetja e Palin nuk dihet sesa votues do të tërheqë apo nëse do ta ndihmojë kandidatin miliarder në zgjedhjet brenda republikanëve në Iowa, sërish mediat thonë se ajo tërheq ende mjaft mbështetje mes konservatorëve. Në një sondazh të vitit 2014, ajo kishte mbështetjen e 82 për qind të votuesve të zonës që e përshkruanin veten si “shumë konservatorë”.
Përgatiti: Juli Prifti – /tesheshi.com/
