Presidenti francez, François Hollande do të merrte një rezultat dërrmues nëse rikandidonte për zgjedhjet presidenciale të vitit të ardhshëm. Ky është sugjerimi që i bëjnë sondazhet shefit të Elizesë, ndërsa edhe pa to, Francois Hollandë renditet tashmë si presidenti më pak popullor e më pak i dashur mes francezëve.
Por, ajo që duket se është edhe më e rëndësishme në rezultatet e sondazheve, është se Hollande do të dilte nga gara që në raundin e parë të zgjedhjeve presidenciale, e kjo sipas të dhënave të publikaura nga gazeta prestigjioze “Le Figaro” dhe nga kanali televiziv, LCI.
Lideri socialist do të merrte 11 për qind deri në 15 për qind të votave në bazë të nëntë kombinimeve të mundshme mes kandidatëve të ndryshëm, e rezultatet janë nxjerrë nga sondazhi i realizuar prej “TNS Sofres-one point”.
Shifrat sugjerojnë se balotazhi do të luftohej mes kandidatit të partisë konservatore, asaj Republikane dhe Frontit Nacional të së djathtës ekstreme, një skenar që më herët është vërejtur vetëm në vitin 2002.
Sondazhi është realizuar në datat 2 deri më 5 shtator mes 1006 votuesve.
Hollande, tepër jopopullor për shkak të menaxhimit që i ka bërë ekonomisë, nuk e ka deklaruar ende nëse do të konkurrojë për një mandat të dytë.
Në një libër publikuar muajin e shkuar ai citohet të ketë thënë se ka dëshirën të konkurrojë, por do të vendoste ta ndërmerrte këtë hap “nëse shenjat janë të atilla që do ta çonin drejt mundësisë së një fitoreje”.
Sipas sistemit zgjedhor presidencial në Francës, nëse asnjë prej garuesve nuk merr një shumicë absolute në raundin e parë, dy kandidatët që përfundojnë të parët këtë raund përballen në balotazh.
Në të djathtë, republikanët do të mbajnë zgjedhjet brenda partisë në muajin nëntor për të përcaktuar kandidatin, e gjasat janë që konkurrenca të jetë e fortë mes ish-presidentit Nicolas Sarkozy dhe ish-kryeministrit Alain Juppé.
Fronti Nacional, ndërkaq, do të përfaqësohet nga Marine Le Pen, vajza e themeluesit të fortë të partisë, Jean-Marie Le Pen.
Sondazhet gjetën se Le Pen dhe Sarkozy apo Juppé, nga ana tjetër, do të kualifikoheshin për raundin e dytë, sipas projeksionit aktual të votave.
Juppe do të merrte 33 për qind dhe Le Pen 29 për qind në një nga skenarët e raundit të parë. Në një tjetër skenar, Sarkozy do të merrte 27 për qind dhe Le Pen, 29 për qind.
Ish-ministri i Ekonomisë në qeverinë e Hollande, 38-vjeçari Emmanuel Macron, që dha dorëheqjen dhe që ka lënë të kuptohet se mund të kandidojë në presidenciale, do të merrte nga 15 deri në 20 për qind të votave.
Raundi i parë i votimeve për presidencialet në Francë do të mbahet në 23 prill dhe balotazhi më 7 maj. Zgjedhjet presidenciale në Francë janë shumë të rëndësishme pasi mund të krijojnë një trend akoma edhe më të fuqishëm drejt rritjes së ndikimit populist në politikën europiane, dhe në të ardhmen e Bashkimit Europian.
Përgatiti: Juli Prifti – /tesheshi.com/
