Luiz Inácio Lula da Silva fitoi raundin e parë të zgjedhjeve presidenciale në Brazil dhe do të përballet me presidentin aktual Jair Bolsonaro në raundin e dytë.
Pas numërimit të 99,7 për qind të votave elektronike, ish-presidenti i krahut të majtë Lula fitoi 48,4 për qind, ndërsa i krahut të djathtë Bolsonaro 43,3 për qind, njoftoi zyra e zgjedhjeve të dielën.
Duke qenë se asnjë kandidat nuk fitoi më shumë se 50 për qind të votave, Lula dhe Bolsonaro si dy kandidatët më të fortë do të shkojnë në raundin e dytë më 30 tetor.
“Lufta vazhdon deri në fitoren përfundimtare”, tha Lula të dielën në mbrëmje. “Ne do t’i fitojmë këto zgjedhje.”
Rezultati ishte shumë më i ngushtë se sa pritej duke pasur parasysh se sondazhet parazgjedhore e tregonin Lulën shumë përpara. Disa ekspertë sugjeruan se të anketuarit nuk i kishin deklaruar preferencat e tyre të vërteta ose thjesht kishin vendosur në ditën e zgjedhjeve.
Nëse Lula fiton raundin e dytë, ai do të jetë presidenti i parë demokratik brazilian që hyn në një mandat të tretë. Ai ishte më parë president nga 2003 deri në 2010.
Më shumë se 156 milionë njerëz patën të drejtën e votës në zgjedhjet e së dielës, ku u zgjodhën edhe guvernatorët, një e treta e senatorëve dhe përfaqësuesit federalë dhe përfaqësuesit e 27 shteteve.
Në debatin e tyre të fundit përpara zgjedhjeve të së dielës, të dy kandidatët shkëmbyen akuza për korrupsion dhe diskutuan pak rreth propozimeve për qeverisjen e vendit të Amerikës së Jugut.
Bolsonaro e quajti rivalin e tij të majtë kreun e një grupi kriminal që drejtonte një “kleptokraci” gjatë dy mandateve presidenciale dhe një “hajdut” sepse ish-presidenti u burgos për korrupsion.
Lula e quajti Bolsonaron një gënjeshtar “të paturpshëm” qeveria e të cilit dha ryshfet për të blerë vaksina gjatë pandemisë Covid-19, e cila ka vrarë më shumë se 680,000 brazilianë. Ai gjithashtu e akuzoi atë për “gjenocid” për politikën e tij hezituese në luftën kundër koronavirusit. /tesheshi.com/
