Presidenti francez Emmanuel Macron është zotuar të forcojë fuqinë strategjike dhe sovranitetin e Evropës, pasi vendi i tij zyrtarisht merr drejtimin mbi bllokun evropian gjatë gjashtë muajve të ardhshëm.
Lajtmotivi i presidencës franceze në gjashtë muajt e ardhshëm do të jetë nevoja për autonomi më të madhe të rajonit, raporton AP.
Macron e ka mbrojtur këtë ide që kur erdhi në pushtet pesë vjet më parë dhe do të përdorë presidencën e rradhës të Këshillit të BE-së për t’u përpjekur ta zbatojë atë në praktikë, tha agjencia.
“Busulla Strategjike e BE-së”
Duke folur në një konferencë të përbashkët shtypi me Presidenten e Komisionit Evropian, Ursula von der Layen, Macron tha se blloku evropian do të finalizojë të ashtuquajturën busull strategjike të BE-së, strategjia e tij gjeopolitike e fokusuar në ndërtimin e aftësive mbrojtëse.
“Kjo do të na mundësojë të kemi një pozicion të përbashkët evropian në NATO dhe të veprojmë së bashku në një mënyrë më të koordinuar,” tha Macron, duke shtuar se ai dëshironte të zhvillonte industrinë evropiane të mbrojtjes dhe të rriste autonominë teknologjike të bllokut.
Mes tensioneve të gjata midis Rusisë dhe Ukrainës, Macron shtoi se BE do të përgatisë gjithashtu propozime për një “arkitekturë evropiane të sigurisë” që është ende shumë e varur nga Shtetet e Bashkuara dhe NATO. /tesheshi.com/
