Edhe tek pyjet, Kosova nuk po mbetet pas Shqipërisë. Dhe, siç thuhet se çdo e keqe e ka dhe një të mirë, në këtë rast, kur sheh se dhe në Kosovë sëpata po bën kërdinë, ngushëllim është afirmimi i faktit se Kosova është vërtet Shqipëri, aq më tepër kur është fjala për Veriun.
Pak cinike kjo, por e pashmangshme në përpjekjen për ta kuptuar se ç’po ndodh dhe në pyjet e Kosovës.
Si e dëshmi e kësaj është shkatërrimi dhe prerja e pyjeve në rajonin e Shalës së Bajgores. Kudo nëpër këtë zonë turistike-malore shihen drunj qindravjeçar që janë prerë e shkatërruar nga dora e njeriu, ndërsa institucionet komunale të Vushtrrisë, Mitrovicës, Zveçanit e Leposaviqit, heshtin.
Sharrat e sopatat janë përditshmëri në këtë rajon të njohur për pyjet masive, ku druprerësit bëjnë punën e tyre të pa u trazuar nga askush, e që dëmet e shkaktuara po janë katastrofale.
Zyrtarët përgjegjës ankohen se nuk kanë numër të mjaftueshëm të rojeve të pyjeve, ndërkohë që drutë e e prera shiten shumë afër godinave të komunave përkatëse.
“Të lutem shumë mos më fotografo”, thotë një prerës ilegal i pyjeve në rajonin e Shalës së Bajgores.
“Unë kam familje, jam i pa punë dhe nuk kam kah t’ia mbaj. Shitja e druve për ngrohje është burimi i vetëm i jetesës për mua dhe familjen time”, thotë një burrë më sëpatë në krah nga fshati Rashan i Mitrovicës.
“Shteti, qeveritarët, janë lëshuar mbas hajnie dhe kanë harruar në tërësi popullatën. Kam 5 fëmijë, 4 prej tyre janë në shkollë. Ata dikush duhet t’i mbajë dhe unë kështu jetoj, duke shitur dru për djegie në Mitrovicë ose në afërsi të burgut të Smrekonicës. Po të kisha një punë, po të kisha të siguruar ekzistencën familjare, unë nuk do të merresha me prerjen dhe shitjen e druve, sepse kjo është punë shumë e vështirë dhe e rëndë”, shton ai më tej duke u lutur që mos ja bëjmë publike identitetin.
Ndërsa dikush tjetër, Bashkim Uka nga fshati Bajgore, denoncon po me të njëjtën logjikë:
“Është e vërtet se pyjet po priten pa asnjë kriter dhe kanë mbetur në mëshirë të prerëseve, pra të sharrave dhe sopatave, por këtu nuk është faji i atyre që presin, është faji i atyre që janë duke ndenjur në karrigen e pushtetit, vjedhin dhe nuk kujdesen fare për mirëqenie të popullatës. Njerëzit duhet të vdesin urie e të mos e presin malin, a pushtetarët të shëtisin me xhipa e të vjedhin sa të duan. Pra këtu është problemi, se mali prehet nga bashkëvendësit e mi për kafshatën e gojës. Ata nuk janë duke menduar për pasoja nga prerja pyjeve, ata po mendojnë për kafshatën e gojës, ndërsa për pasoja le të mendojë udhëheqësit e le të zgjidhin këtë problem shumë të rënda duke i punësuar njerëzit”, ka thënë Uka.
Në anën tjetër, Irfan Peci, zyrtar i lartë për çështje ambjentale në komunën e Mitrovicës, ka informuar se në afro mbi 8 mijë hektarë me pyje, janë vetëm vetëm 7 rojtarë të pyllit, pra që është shumë pak sipas tij.
“E dimë që ka prerje e dëmtime të shumta të pyjeve e sidomos në rajonin e Shalës së Bajgores, por Drejtoria për Ambient dhe Pyje, është duke bërë një planë veprimi për ndalim e prerjes ilegale. Së shpejti do të fillojmë një aksion në bashkëpunim me strukturat policore ku prerësit e pyjeve do të ndëshkohen. Po ashtu, do të bëjmë edhe një fushatë për t’i njoftuar banorët e zonave malore e të tjerët, me pasojat ligjore që do të kenë prerësit ilegalë që do të kapen nga rojtarët e pyjeve, nga policia dhe inspektorët e tjerë komunal”, ka sqaruar Peci.
Pas prerjeve të shumta të pyjeve, vihet re prej vitesh dhe pakësimi i ujërave të lumenjve, tharja e burimeve dhe ndryshime klimatike e mikroklimatike. Ndërkohë që dhe në qytete, ka një shtim të dukshëm të pluhurit dhe i dioksidit te karbonit, pikërisht nga prerja e mushkërive të qyteteve, sidomso në Mitrovicë, nga prerjet e shumta në pyjet e Shalës së Bajgores. /tesheshi.com/
