Presidenti i SHBA-së Donald Trump beson se një armëpushim në Gaza midis Izraelit dhe Hamasit mund të arrihet brenda një jave.
Trump u tha gazetarëve në një aktivitet në Zyrën Ovale për të shënuar nënshkrimin e një marrëveshjeje midis Kongos dhe Ruandës se ai beson se një armëpushim është afër.
Ai shtoi se sapo kishte folur me njerëz të përfshirë në përpjekjet për të ndaluar konfliktin midis Izraelit dhe Hamasit në enklavën palestineze.
Hamasi ka thënë se është gati të lirojë pengjet e mbetura në Gaza si pjesë e çdo marrëveshjeje për t’i dhënë fund luftës, ndërsa Izraeli këmbëngul se lufta mund të përfundojë vetëm nëse Hamasi çarmatoset dhe shpërbëhet.
Por Hamasi refuzon të lëshojë armët.
Mundësi për paqe
“Mendoj se jemi afër. Sapo fola me disa nga njerëzit e përfshirë(në negociata),” tha Trump.
“Ne besojmë se do të kemi një armëpushim javën e ardhshme,” shtoi ai.
Ministri izraelit i Çështjeve Strategjike, Ron Dermer, planifikon të vizitojë Uashingtonin të hënën për bisedime me zyrtarët e administratës Trump në lidhje me Gazën, Iranin dhe për një vizitë të mundshme të Netanyahu-t në Shtëpinë e Bardhë, raportoi Reuters, duke cituar një burim të njohur me çështjen.
Netanyahu tha të enjten se rezultati i luftës midis Izraelit dhe Iranit paraqet një mundësi për paqe që Izraeli nuk mund ta humbasë.
“Kjo fitore paraqet një mundësi për të zgjeruar në mënyrë dramatike marrëveshjet e paqes. Ne po punojmë për këtë me shumë entuziazëm”, tha Netanyahu. /tesheshi.com/
