Behgjet Pacolli, njeriu i cili ka dhënë një kontribut jo të vogël në shtimin e njohjeve për Kosovën që pas shpalljes së pavarësisë, ka bërë një premtim të madh nga Gjilani duke thënë se nëse vendi qeveriset nga koalicioni LDK, AKR, Alternativa, do arrihet në 160 njohje të reja.
Por ky nuk ka qenë i vetmi premtim i përmasave ciklopike i presidenti i AKR-së. Ai, para të rinjve gjilanas, shtoi se programi ekonomik parasheh rritje deri në 8% vetëm në vitin e dytë të qeverisjes.
“Sot kemi rritje ekonomike 2.8 deri ne 3.3%. Plani ynë për rritje ekonomike prej 8%, krijon 70 deri në 80 mije vende të reja pune, ndërsa në fund tPë manatit buxheti do ta kalojë shifrën 6 miliard”, ka thënë Pacolli.
Gjithashtu, Pacolli ka premtuar edhe reforma në sistemin arsimor, qendra rekreative e sportive në çdo qytet, ku të rinjtë do të kenë mundësi t’i zhvillojnë aftësitë e tyre më tutje.
Ai ju bëri thirrje të rinjve gjilanas që ta votojnë koalicionin e shpresës, që sipas tij garanton mirëqenie dhe perspektivë të qartë për qytetarët e vendit. /tesheshi.com/
