Nga Blendi Gashi
Ministrat e rinj kosovarë, pas besimit që morën për të qenë pjesë e kabinetit qeveritar “Haradinaj” kanë nisur të artikulojnë premtime dhe zotime, sikundër ndodh gjithmonë në raste të tilla.
Mes mesazheve të shumta që jepen, gjen edhe të tilla si Kosova “pas katër vitesh do lulëzojë si në fushën e zhvillimit ekonomik, rrugën euroatlantike, sundim të ligjit, shëndetësi dhe çdo fushë tjetër.”
Por edhe 18 vjet paslufte, situata në vend në të gjitha fushat e sipërpërmendura vazhdon të jetë e brishtë, çka do të thotë se premtimet kanë mbetur në letër.
Megjithatë. për të qenë korrekt me qeverinë e re, duhen pritur së paku 100 ditët e para për të parë nëse kabineti “Haradinaj” do të punojë fuqishëm apo jo.
Premtimet e para …
Pacolli s’premton njohje…
Behgjet Pacolli, zv.kryeministër, njëherësh ministër i Jashtëm, është i vetëdijshëm se vendin e presin sfida të mëdha dhe çuditërisht nuk ka paralajmëruar ndonjë njohje të re.
“Sfida të mëdha na presin. Së bashku dhe me përkushtim për Zhvillim Ekonomik, punësim dhe perspektivë për Kosovën Evropiane”, thotë ai.
Tahiri premton luftë ndaj krimit e korrupsionit
Abelard Tahiri – ministër i Drejtësisë po ashtu ka thënë se është i vetëdijshëm për sfidat që e presin, ndërsa ka premtuar se do të punojë fuqishëm për ta këndellur këtë sektor që pothuajse është në fund të pusit.
Ai ka thënë se së bashku me të gjithë kolegët pranë MD-së do të punojë në forcimin e sundimit të së drejtës, luftën ndaj krimit të organizuar dhe korrupsionit.
Ismaili premton gjetjen e ilaçit për shëndetësinë
Uran Ismaili – ministër i Shëndetësisë beson se do ta ringjallë shëndetësinë kosovare, e cila prej vitesh lëngon tej mase.
“Vullneti qytetar e demokratik u përmbush. Vendi ka nevojë për zhvillim dhe ai do të vijë. E shëndetësisë, do t’ia gjejmë ilaçin. Jam jashtëzakonisht i vetëdijshëm për gjendjen e rëndë në këtë sektor, por po ashtu jam plot me vullnet e besim se do t’ia dalim”, ka shkruar ai në Facebook.
Dhurata s’flet për heqjen e vizave
Dhurata Hoxha, ministre e Integrimeve Evropiane pret që proçesi euro-atlantik i vendit të përmbyllet shpejt, por nuk ka folur për heqjen e vizave.
“Integrimi evropian, është sfidë e vendit tonë, mirëpres bashkëpunimin e të gjithë faktorëve relevantë që procesi euro-integrues të përshpejtohet dhe përmbyllet sa më shpejt dhe qytetarët e vendit tonë të bëhen pjesë e vlerave integrale, të pandashme të Bashkimit Evropian!”, thotë ajo.
Premtimet e Inovacionit…
Besim Beqaj – ministër i Inovacionit dhe Ndërmarrësisë ka treguar disa nga strategjitë që do përdorë në qeverisje me bindjen se do të sjell investime të huaja në vend dhe do të zhvillojë ndërmarrjet e vogla dhe të mesme.
“Si ministër i Inovacionit dhe Ndërmarrësisë, do të angazhohem për politika që do të orientohen drejt rritjes së aktivitetit ekonomik në vend, me prioritetet zhvillimin e sektorit privat, zhvillimin e NVM-ve prodhuese të cilat do të jenë bartëse të punësimit dhe eksportit. Reforma institucionale për thithjen e investimeve të huaja, Inkubatorët e Biznesit dhe Qendrat e Inovacionit për dinamizimin e ndërmarrësisë, Ambasadorët Digjital për digjitalizim dhe ndërlidhje me fuqitë botërore të teknologjisë, janë këto disa nga strategjitë kryesore të qeverisjes sime. Ju siguroj që këtë detyrë do ta ushtroj me përgjegjësi të plotë”, premton Beqaj.
“Në krye të detyrës…”
Pal Lekaj – ministër i Infrastrukturës nuk ka bërë ndonjë premtim konkrekt, por ka ndjekur rrugën e shefit të tij duke thënë se do të punojnë fuqishëm si kabinet qeveritar.
“Na priftë e mbara. Do të jem bashkë në krye të detyrës”, thotë Lekaj.
Albena Reshitaj – ministre e Mjedisit dhe Planifikimit Hapësinorë po ashtu ka premtuar se do të angazhohet fuqishëm që të sjellë rezultate në dikasterin që drejton.
Bajram Hasani, ministër i Tregtisë është zotuar se detyrën do ta kryej me ndershmëri dhe profesionalizëm.
“Kryetari ynë Fatmir Limaj sot dëshmoi se nuk është si të tjerët duke i dhënë përfaqësim edhe duke e fuqizuar Anamoravën, rajonin prej nga unë vij. Zotohemi për një Kosovë më të zhvilluar, ku gjithsecili qytetarë do të jetojë në mirëqenie”, thotë Hasani. /tesheshi.com/
