Nga Blendi Gashi
Prej dy javësh, kandidatët e partive për kryetarë të komunave të Kosovës kanë nisur fushatën për lokalet e 22 tetorit, ku çdo ditë shpalosin premtime nga më të ndryshme edhe pse janë të vetëdijshëm se as gjysmën prej tyre nuk do t’i realizojnë.
Shumica prej tyre të veshur me rroba firmato, telefona të shtrenjtë në duar e vetura luksoze shkojnë edhe në fshatrat më të thella ku pa pasur turp u premtojnë parajsën banorëve, shumica e të cilëve janë lodhur nga skamja.
Për më keq. një numër jo i madh i këtyre kandidatëve që tentojnë të marrin edhe një mandat tjetër kërkojnë votën me premtime të njëjta, të cilat i kanë bërë edhe në fushatën e lokaleve të 2013-tës dhe nuk i realizuan kurrë.
Pra disa prej tyre me anë të premtimeve “copy-past”, pa ndonjë plan konkrekt kërkojnë sërish besimin qytetarëve duke u premtuar përmirësim të infrastrukturës rrugore në fshatra e qytete, ndërtimin e kanalizimeve, ndërtimin e shkollave e çerdheve të reja, ujë 24 orë, etj.
Analistët politik kanë qëndrime të kundërta rreth mënyrës si është zhvilluar fushata nga kandidatët gjatë këtyre dy javëve, pra kanë qëndrime “pro dhe kundra” rritjes së kualitetit rreth programeve e vet figurave të kandidatëve për kryetar komunash.
Shemsi Jashari, nga rrjeti i organizatave “Demokracia Fillon Këtu”, që do të monitorojë zgjedhjet lokale të 22 tetorit, njëherësh analist politik, mendon se ka një përmirësim dhe një kualitet më të madh në ofertën për qeverisje lokale, në dallim nga zgjedhjet e kaluara që kanë dominuar temat rreth ndërtimit të rrugëve dhe infrastruktures.
“Në këto ditë fushate kemi ndëgjuar për premtime me theks në përmirësimin e gjendjes në arsim si emërues i përbashkët, pastaj në investimet dhe kujdesin për fushën e shëndetësisë dhe në disa rajone që njohura për kultivimin e produkteve bujqësore kemi ndëgjuar premtime për investime në bujqësi. Përveç nevojës për ndryshim dhe konsumimi temave pa analizë dhe pa vizion të qartë që kishim në zgjedhjet e kaluara, mendoj që ngritja e cilësisë së fushatës dhe premtimeve vjen edhe si rezultat i mesazhit që qytetari dha, në zgjedhjet e 11 qershorit 2017 dhe demonstrimi në praktikë se qytetari ka ndryshuar në bindje, emancipim dhe se më nuk mund t´ i ofrohet gjithçka, pasi ai, sidomos gjeneratat e reja kanë filluar të vlersëojnë më shumë ofertat dhe përsonalitetin e kandidatëve se sa orientimin politik të tyre”, thotë Jashari për tesheshi.com.
Ndërsa lidhur me kandidaturat e partive për kryetar komunash, Jashari thekson se në këto zgjedhje ka përparim edhe në këtë aspekt.
“Në këto zgjedhje shohim shumë fytyra të reja dhe pa afera të kandidatëve nga të gjitha partitë politike dhe kjo shënon një pikë kthese dhe shkëputje nga figurat që tashmë jemi mësuar ti shohim për me shumë se një dekadë”, thotë Jashari.
Por qëndrim krejt tjetër ka njohësi i rrethanave politike, Ali Hertica, sipas të cilit dy javët e fushatës janë një tregues se partitë nuk kanë një vizion të qartë se si do ta përmirësojnë jetën e qytetarëve, pasi nuk kanë shpalosur një program konkret por kanë bërë përsëritje të premtimeve nga zgjedhjet e kaluara.
“Kur të gjitha partitë flasin për kanalizime edhe 17 vjetësh pas lufte, probleme të cilt është dashur të harrohen, atëherë vështirë të pritet se do përmirësohet jeta e banorëve. Premtimet që ata bëjnë do mbesin vetëm fjalë pasi nuk do i realizojnë shumicën e projekteve”, thotë Hertica për tesheshi.com.
Ai më tej shton se vet shumica e figurave që janë zgjedhur për kreytar komunash nga partitë nuk premtojnë se do bëjnë gjë pozitive që do mbahet mend në komunat nga vijnë.
“Nga debatet mund të shihet se shumica e kandidatëve për kryetar nuk kanë ndonjë bagazh të madh politik që mund të llogaritet si përparësi për të punuar ndershëm për komunat ku kandidojnë. Se nuk do bëjnë ndonjë punë që do mbahet mend tregon edhe fjalori banal që shumica e kandidatëve po e përdorin gjatë debateve televizive në vend se të shpalosin programin në mënyrë sa më të deteajuar. Qytetarët nuk duan të dëgjojnë akuza mes kandidatëve por programin e tyre se cili është më i pasur për mirëqenien e banorëve”, thotë Hertica. /tesheshi.com/
