Nga Blendi Gashi
Thënia “shpif, shpif se diçka do të mbetet!”, në fushatën elektorale të Kosovës mund të përkthehet dhe si “premto, premto, se diku do t’zane!”. Partitë kanë shqyer thesin e premtimeve duke i servirur miletit të etur lloj-lloj marrëzirash.
Mjaft të vërehet se eksponentë politikë si janë derdhur fshatrave, arrave, stallave me lopë, për të kuptuar se ç’teatër asburd kanë zgjedhur të luajnë.
Dallon këtu koalicioni PDK-AAK-Nisma, që gati se nuk e ka artikuluar dhe “parajsën” si premtim në këmbim të votës.
Por sa mund të jetësohen këto premtime të cilat janë të njëjta në çdo parë zgjedhje?
Njohësit e çështjeve politike konsiderojnë se pjesa dërrmuese e tyre janë vetëm elektorale dhe vështirë të realizueshme.
Mentor Tahiri, thotë se me fare pak përjashtime, në fushatë zgjedhore të këtyre ditëve, nuk po shihet as edhe ndonjë projekt konkret, por vetëm retorikë manipuluese.
“Në këtë drejtim, duhet pranuar se në mesin e shumicës së subjekte ka recidivizëm në premtime që si të tilla apriori janë të pambulueshme. Këto zgjedhje janë një rast i mirë, që votuesi kosovar të ndëshkojë me votë, cfarëdo mungesë oferte konkrete dhe të iu tregoj vendin oratorëve të politikave boshe”, thotë Tahiri për tesheshi.com.
Leon Duhanaj, thotë se çdo fushatë elektorale është pak a shumë e ngarkuar me premtime, shpeshherë jo reale.
“Për çdo premtim që bëhet, ka edhe disa vendime që duhet t’i paraprinë. Ata që zotohen për t’i kryer disa çështje, edhe do ta marrin pushtetin. Unë besoj që është treni i fundit që politika kosovare të reflektojë në raport me të ardhmen e përbashkët dhe të mirën e përgjithshme.
Brenda koalicioneve, ka mjaft eskpertë që mund të bëjnë punë të mira. Ajo çfarë i duhet Kosovës është guximi politik, dhe vullneti i madh për t’i shtyer gjërat përpara. Po shpresoj që qeverisja e re do të jetë më konkrete, dhe më produktive”, thotë Duhanaj për tesheshi.com.
Faik Krasniqi, mendon se premtimet që po bëhen nga partitë nuk kanë fare rëndësi, sepse ato i sheh si gënjeshtra dhe thjesht fushatë për të fituar vota dhe asgjë më shumë.
“Ajo çfarë ka rëndësi është se deri më tash asnjë nga premtimet e tyre të mëhershme nuk i kanë zbatuar fare. Dhe në mendjen e çdo partie që e ka shijuar pushtetin motoja e tyre është: ‘E dinë që po i rrejmë, edhe prapë na votojnë’. Prandaj qytetari i Kosovës ka shumë arsye që të dal në zgjedhje e t’i ndëshkojë me votë të gjitha ato parti dhe ata kandidatë që deri më tash i kanë gënjyer”, thotë Krasniqi për tesheshi.com.
Fushata sapo ka nisur dhe për gati se një javë, pritet një dehje dhe më e madhe nga premtimet. Ato janë deri dhe fyese për inteligjencën normale, sidomos kur t’i servir ai që ka qenë në pushtet. /tesheshi.com/
