Ministri i Rendit Sandër Lleshaj premtoi pastrimin e territorit shqiptar nga kanabisi para zgjedhjeve të 25 prillit.
“Duam që këtë vit betejën me kanabisin ta përfundojmë para se të nisë fushata zgjedhore, që të shterojmë çdo përpjekje për të pasur interferenca të elementëve në këtë fushë. Ne po angazhohemi shumë dhe ju garantoj që do të ketë sukses”, tha Lleshaj nga Shkodra.
Sipas tij, këtë vit nuk është kultivuar më shumë kanabis por është kapur më shumë.
“Ka pasur një intensitet të lartë të kontrollit se ka pasur më shumë kapacitet, më shumë mjete, më shumë orë fluturimi nga ajri nga të huajt dhe vendas, ka pasur më shumë drogë e për rrjedhojë janë gjetur më shumë se vitin e kaluar.
Kjo nuk do të thotë që është kultivuar më shumë, por që është goditur më shumë.
Nuk ka më shumë kanabis në treg se një vit më parë. Kjo sepse destinacionet e kanabisit nga Shqipëria që përfshinë Italinë, Greqinë, Mali i Zi kanë provuar se sasia e sekuestruar është shumë herë më e ulët se sasia e sekuestruar në vitin 2019.
Sivjet në Itali janë sekuestruar 911 kg nga Shqipëria, ndërkohë në vitet e shkuara janë kapur me tonelata, do të thotë që prodhimi ka rënë në mënyrë të ndjeshme.
Dhe një tregues tjetër është çmimi i kësaj lënde në tregun e zi që ka arritur në nivele stratosferike krahasuar me vitet e tjera”, shtoi Lleshaj. /tesheshi.com/
