Mu në kohën e mbytjes së Shqipërisë në kanabis, kreu i Rendit, Saimir Tahiri ka dhënë një premtim tejet të guximshëm për të mos u marrë në konsideratë. Ai ka deklaruar se ky vit, pra 2017-ta, do jetë viti i ç’kanabizimit të vendit, ngjashëm më Lazaratin.
“Trashëguam një problem me kanabisin dhe po merremi për ta zgjidhur. Kjo është shenja më e fortë e vendosmërisë sonë për një luftë kundër këtij fenomeni. Ky është vit deciziv për t’i dhënë fund një herë e mirë këtij fenomeni. E nisëm me Lazaratin dhe të njëjtën gjë do të bëjmë me çdo cep të Shqipërisë”, tha Tahiri.
Kjo deklaratë e tij vjen nja ditë pasi një ndër krerët e anti-mafias italiane, Franco Roberti, gjatë një vizite në Tiranë tha se sasia e kanabisit e ardhur nga Shqipëria është trefishuar.
Situata post-Lazarat e drogës në Shqipëri përbën njollën më të zezë të qeverisë Rama. Paçka mbrojtjes me anë të shifrave dhe statistikave, këto të fundit nuk e kanë ndryshuar bindjen e përgjithshme të opinionit se droga ka marrë hov të jashtëzakonshëm gjatë dy viteve e fundit.
Por premtimi i bërë së fundi nga Tahiri, që vlen të quhet historik për vetë delikatesën që bart, është diçka tej retorikës së zakonshme politike, që me gjasë nuk do harrohet dhe do jetë pjesë e ligjërimit e mëtejshëm politik. /tesheshi.com/
