Fitorja në duelin derbi ndaj Liverpool-it, ishte vetëm një sinjal i dobët për rikthimin e skuadrës së Luis van Gaal, që dështon sërish të triumfojë në shtëpi. Djajtë u turpëruan nga Southampton në Old Trafford, pasi tre minuta para fundit të ndeshjes Chrlie Austin shuajti çdo iluzion të tifozëve vendas për një rikthim të mundshëm.
Aspak më mirë nuk kaloi skuadra tjetër nga Manchesteri. Citizens u ndalën në një barazim gjatë udhëtimit tek West Ham United (2-2), që tregohet edhe njëherë rival i fortë për skuadrat nga kreu i tabelës. Në fakt dueli pati dy protagonistë, Enner Valencian e vendasve dhe Sergio Agueron tek miqtë, që realizuan nga dy gola secili për epilogun final të ndeshjes, barazimin. Këto pikë të humbura lënë prapa skuadrën e Manuel Pellegrinit, që tani gjendet tre pikë prapa liderit Leicester City.
Një duel interesant ishte edhe ai ndërmjet skuadrës, Crystale Palace dhe Tottenham. Gjelat e Londrës, rikthyen lojën pas autogolit të Vertonghen, me ç’rast në minutën e 63 shënoi Kane, pastaj në minutat e fundit u shënuan edhe dy gola tjerë me anë të Chadlit dhe Allit.
Ndeshje dramatike në Carrow Road
Ishin 90 minuta aksion dhe dramë në duelin e zhvilluar ndërmjet Norwich Cityt dhe Liverpool. Futbollistët e drejtuar nga trajneri gjerman Jurgen Klopp, që ishin në disavantazh (3-1), në fundin e ndeshjes ia dolën të rikthenin epilogun në krahun e tyre, (4-5). Kjo fitore i afron të kuqtë edhe më shumë drejt zonës europiane, megjithëse kanë një malore për t’u ngjitur. /tesheshi.com/
