Të besuarit e Claudio Ranieri-t kanë të drejtën e plotë të ëndërrojnë titullin e Ligës Premier, pasi kanë mposhtur gjithë “bigët” në ishull që kanë të njëjtin pretendim. Manchester City është skuadra e rradhës që ka ngritur flamurin e bardhë para Leicester City-t, pasi është gjunjëzuar në shtëpi, (1-3).
Dueli nisi në mënyrën më të mirë për miqtë që golin e parë e realizojnë me të dalur nga tuneli. Në aksionin e parë të ndeshjes, gjermani Robert Huth dërgon topin prapa gardianit Joe Hart, duke paralajmëruar një ndeshje dramatike.
Megjithëse vendasit morrën frenat e lojës nën kontroll dhe në vazhdimësi kërkonin mundësinë për të barazuar rezultatin, ishin udhëtuesit ata që dolën të jenë më konkret, të cilët finalizuan edhe dy aksione të tjera, për t’i mbyllur llogaritë e ndeshjes.
“Deja vu” sikurse në pjesën e parë të lojës. Me të nisur fraksioni i dytë i ndeshjes mysafirët shënojnë përmes Riyad Mahrez, që realizon një gol shumë të bukur. Firmën për fitoren e pesëmbëdhjetë të sezonit për skuadrën e Leicester City-t, e jep Huth, që realizon golin e dytë.
Minutat e mbetur ishin ankth për citizenssat, që duhet t’i falenderohen gardianit Joe Hart që nuk e pësuan më thellë në këtë duel. Ndërkohë, golin e nderit për “qytetarët” në fundin e ndeshjes e realizon Kun Aguero, pas “servirjes në pjatë” nga mesfushori i përfaqësueses së Kosovës, Bersant Celina. /tesheshi.com/
