Skuadra e Pep Guardiola-s gjendet fare pranë pjesëmarrjes në Champions League sezonin e ardhshëm. Mjafton një pikë në javën e fundit, dhe vendi i katërt është i siguruar, ndërkohë që një fitore do ta linte atë në vend të tretë në përfundim të kampionatit anglez.
Mançester Siti mposhti fare thjesht, 3-1, Uest Bromuiçin mbrëmjen e së martës, në një prej ndeshjeve të prapambetura. Gabriel Jesus, De Bruyne dhe Yaya Toure ishin shënuesit e golave të një fitoreje me mjaft vlera.
Tashmë në kuotën e 75 pikëve, dhe në vend të tretë në renditje, Mançester Siti do të luajë të dielën në fushën e Uotfordit, ku i mjafton çdo rezultat pozitiv për të garantuar pjesëmarrjen në Champions League kur të nisë sezoni i ri.
Shpresat gjallë për një përfshirje në katërshen e parë në renditje i mbajti gjallë dhe Arsenali, që fitoi 2-0 po mbrëmjen e së martës ndaj Sandërlendit të vendit të fundit.
Alexis Sanchez ishte sërish shpëtimtari për “topçinjtë”, me dy gola të realizuar në njëzet minutat e fundit të lojës.
Arsenali ka 72 pikë, një më pak se Liverpuli i vendit të katërt. Do duhet të dështojë Liverpuli në javën e fundit që Arsenali të ngjitet më sipër. Liverpuli pret Midëllsbroun të dielën, një kundërshtar që ka zbritur në Championship, kurse Arsenali luan në fushën e vet ndaj Evertonit, që nuk ka asnjë objektiv. /tesheshi.com/
