Skuadra e Pep Guardiola-s ka arritur sot fitoren e 16-të në 25 javë të Premier League-s angleze, duke u bërë ndjekësi më i afërt i Çelsit kryesues.
Në transfertën ndaj Bornmëthit, lojtarët e Mançester Sitit e kanë goditur kundërshtarin në momentet e duhura, duke siguruar një fitore të pastër, 0-2.
Sterling do të ndryshonte shifrat në minutën e 29-të; rezultati u thellua në favor të miqve në minutën e 69-të, falë një autogoli nga Mings.
Kjo ishte fitorja e tretë radhazi për Mançester Sitin, që ka ngjitje në lojë e rezultate.
Mançester Siti ka tani 52 pikë, tetë më pak se Çelsi i vendit të parë.
“Diferenca është ende e madhe. Thjesht do të përqendrohemi në ndeshjen e ardhshme,” do të deklaronte Guardiola pas ndeshjes, me mendjen te dëmtimi i Gabriel Jesus-it, shkalla e dëmtimit të të cilit nuk është ende e ditur. /tesheshi.com/
