Lestër Siti i ka bërë një nisje të tmerrshme kampionatit anglez vetëm pak muaj pasi do të shkruante historinë me fitimin e trofeut. Tre humbje do të pësonte Lestëri gjatë gjithë sezonit të shkuar, por në nisje të këtij sezoni shënon humbjen e parë që në ditën e parë.
Aq më keq që kjo humbje vjen nga një skuadër që është në mes të katër rrugëve. Pa trajner, pa kryer transferime lojtarësh, Hall Siti është skuadra që parashikohet ta ketë të pamundur qëndrimin në Premier League.
Por ja që kampionati i surprizave të panumërta sjell një surprizë të tillë që në takimin e parë. Hall Siti fitoi 2-1 ndaj Lestër Sitit, e për më tepër, me meritë të plotë.
Lestëri vuajti mungesën e Robert Huth-it në qendër të mbrojtjes, si dhe formën aspak të pëlqyeshme të golashënuesit më të mirë për të në sezonin e mëhershëm, Vardy-t, që nuk ia doli të shënonte në rastet e paraqitura.
Diomande do t’i kalonte vendasit në epërsi në mbyllje të pjesës së parë. Mahrez do të barazonte me 11-metërsh me të nisur pjesa e dytë. Hall Siti do ta rimerrte epërsinë në minutën e 57-të, kur do të realizonte Snodgrass.
Rezultati nuk pësoi më tutje ndryshim, me Hall Sitin që merr tre pikët e para, aq të nevojshme për moralin e një skuadre në telashe. Përndryshe, për Lestërin nis rënia e sirenës së alarmit që në nisje të kampionatit.
“Ky sezon do të jetë më i vështirë se i fundit,” deklaroi trajneri i Lestërit, Claudio Ranieri. Bëmë shumë përpjekje sot, por jo si ekip. Sot luajtëm individualisht.” /tesheshi.com/
https://youtu.be/lIwNnQNF618
