Janë luajtur këtë pasdite shtatë prej ndeshjeve të javës së tretë të kampionatit anglez. E para përballje, dhe një prej më të rëndësishmeve, ka qenë ajo mes Totenhemit dhe Liverpulit, e mbyllur në barazim 1-1. E para ka kaluar në epërsi skuadra udhëtuese, Liverpuli, pas golit të shënuar nga Milner në minutën e 43-të me 11-metërsh. Baraspesha është vendosur në minutën e 72-të, kur ka barazuar Rose.
Nga ndeshjet e orës 16:00, Çelsi ka fituar 3-0 me Bërnlin, duke shënuar të tretën fitore në tre javë kampionat. Hazard, Uillian dhe Moses kanë qenë shënuesit e golave.
Ka ardhur dhe fitorja e parë për Lestërin, që ka mposhtur 2-1 Suonsi Sitin. Vardy e Morgan realizuan në minutën e 32-të dhe të 52-të, ndërsa Mahrez nuk ia doli ta thellonte rezultatin, duke çuar dëm një 11-metërsh. Për miqtë i ngushtoi shifrat Fer në minutën e 81-të.
Të parën fitore arriti dhe Arsenali, që në fushën e Uotfordit mori 3 pikë pas rezultatit 1-3. Cazorla, Sanchez dhe Ozil i kthyen buzëqeshjen Venger-it, që ka qenë në vështirësi për shkak të paraqitjeve të dobëta të skuadrës së tij.
Në takimet e tjera, Kristëll Pallasi dhe Bornmëthi barazuan 1-1, Evertoni fitoi 1-0 ndaj Stouk Sitit, dhe po 1-1 mbaroi sfida Sauthempton – Sandërlend. /tesheshi.com/
