Londinezët e Çelsit bënë dhe një hap tjetër përpara drejt titullit të dytë në tre sezone të kampionatit anglez, duke mundur 3-1 Suonsi Sitin në “Stamford Bridge”.
Me 63 pikë në 26 ndeshje, Çelsi ka tre më shumë se në të njëjtën pjesë të dy sezoneve më parë, kur shpallej për herë të fundit kampion.
Kjo ishte fitorja e dhjetë radhazi në shtëpi në Premier League, dëshmi e stabilitetit të lojës së Çelsit, posaçërisht në fushën e tij.
Megjithatë, ndaj Suonsi Sitit nuk ka qenë aq e thjeshtë. Golin e parë të ndeshjes e shënoi spanjolli Fabregas, në ndeshjen e tij të 300-të në kampionatin anglez.
Golat patën të tërë firmën spanjolle; në fund të pjesës së parë qe Llorente që barazoi për miqtë. Ishte Suonsi Siti që mund të merrte epërsinë nëse gjyqtari Neil Swarbrick do të kishte dhënë në pjesën e dytë një 11-metërsh për një prekje të qartë me dorë nga mbrojtësi Azpilicueta.
Tre minuta pas nderit që gjyqtari i bëri Çelsit, vendasit kaluan në epërsi me anë të Pedro-s. Diego Costa vulosi fitoren në minutën e 84-t.
Çelsi ka tani 11 më pikë më tepër se Mançester Siti i vendit të dytë, që vetë nuk do të zbresë në fushë këtë fundjavë. /tesheshi.com/
