Pasditja e së shtunës në Premier League nisi me një tjetër humbje të Arsenalit, që po lëshon dalëngadalë terren dhe në luftën për të qëndruar mes katër vendeve të para, prej nga mundësohet dhe pjesëmarrja në Champions League në sezonin e ardhshëm.
“Topçinjtë” humbën 3-1 në fushën e Uest Bromuiçit; një humbje që pason atë me të njëjtin rezultat dy javë të shkuara ndaj Liverpulit.
Ndryshe ngjau me kryesuesit e Çelsit, që nuk kanë të ndalur. Viktima sot ishte Stouk Siti, edhe pse luante në fushën e vet.
Fitorja erdhi vonë për Çelsin, në minutën e 87-të, kur Cahill e çoi rezultatin nğ 1-2 pas një ekuilibri të gjatë në fushë. Me 13 pikë larg Totenhemit, ekipit që renditet i dyti në klasifikim, do të ishte befasi e madhe nëse Çelsi nuk do ta fitonte titullin këtë sezon.
Vazhdon të çudisë Lestër Siti, shpërthimi i të cilit nuk ka të mbaruar që prej largimit të Ranieri-t. Në fushën e Uest Hemit, Lestëri ka fituar 2-3.
Eshtë kjo fitorja e katërt radhazi për Lestërin në të gjitha aktivitetet; e treta në kampionat.
Në takimet e tjera, Kristëll Pallas fitoi 1-0 ndaj Uotfordit, Evertoni shkatërroi 4-0 Hall Sitin. E vetmja ndeshje pa gola e së shtunës qe ajo mes Sandërlendit dhe Bërnlit.
Me interes pritet takimi i së dielës mes Mançester Sitit dhe Liverpulit. /tesheshi.com/
