E djeshmja në politikën shqiptare pati disa zhvillime të pazakonta, ndonëse brenda një trendi të vazhdueshëm të jonormalitetit politik. Ndër to, ishte dhe ndryshimi i beftë i kursit politik të opozitës që, teksa kishte paraqitur kërkesën për një mocion shkarkimi ndaj kreut të Kuvendit Ilir Meta, pothuasje nuk morr fare me të. Dhe, si në reportimin gazetaresk e si në komunikimin mes vetë aktorëve politikë në sallën e parlamentit, ky fakt nuk u evidentua.
Sa për kujtesë: të mërkurën, opozita paraqet në Kuvend kërkesë për mocion, për shkarkimin e Ilir Metës nga kryetar Kuvendi. Kërkesa kishte një formulim të qartë politik e konstitucional. Nga ana e tij, Meta nuk hezitoi ta firmoste këtë kërkesë, duke pritur paraditen e djeshme për të vijuar hapat e mëtejshëm proçeduriale sipas rregullores së Kuvendit, për ta çuaar atë drejt votimit. Por kjo nuk ndodhi. Opozita u fut në sallë vetëm me kërkesën gojore dhe ultimative për dorheqjen e vetëvullnetshme Metës. Ndërsa mocioni u la në harresë.
Praktika e mocioneve nuk është e panjohur në zhvillimet politike shqiptare. Më të freskëta janë rastet kur e majta në opozitë, kërkoi disa herë mocione ndaj kryetares së atehërshme të Kuvendit, znj. Topalli. Dhe bëhet fjalë për tre mocione, në përiudha të ndryshme. Të trija mocionet u rrëzuan më votat e shumicës, por siç komentohej nga opozita, ato kishin vlerën e akteve të domosdoshme politike në funksion të jetës parlamentare. Dhe dje, ishte ndër të rrallat, në mos i vetmi rast në politikën shqiptare të afro dy dekadave, ku një akt i kërkuar mocioni anullohet në një formë jozyrtare nga vetë autorët e tij. /tesheshi.com/
