Procedura e Prokurorisë që i kërkon Kuvendit dhënien e lejes për arrestimin e Saimir Tahirit, është e treta në historinë parlamentare të Shqipërisë që nga viti 1991.
Në dy rastet e para kur u arrestuan deputetë, në vitin 1993 me Fatos Nanon dhe 1994 me Arben Likën, prokuroria kërkoi vetëm heqjen e imunitetit dhe i arrestoi pa kërkuar leje në Kuvend, megjithëse e ka pasur që atëherë detyrë Kushtetuese.
Rasti i parë i kësaj leje ishte Mark Frroku, mbi të cilin kishte një vendim gjykate që e kishte dënuar për vrasje. Rasti i dytë ishte për Armando Prengën, për të cilin kishte vendim gjykate se qëlloi me pistoletë ndaj një shtetasi, dhe rasti i tretë është me Saimir Tahirin sot.
Por nuk është hera e parë që Prokuroria kërkon procedimin ndaj deputetëve dhe, nëse i referohemi periudhës para vitit 2013 nuk ka pasur kaq kollaj leje për të “punuar” e lirë drejtësia.
Për ta ilustruar këtë po marrin rastin më të bujshëm të janarit të vitit 2011, rast që shkaktoi edhe protestën e 21 janarit, ku u vranë nga armët e Gardës së Republikës 4 qytetarë.
Pra bëhet fjalë për rastin e Ilir Metës, bllokut të tij të famshëm.
Siç dihet tashmë, në videon e shfaqur nga Fiks Fare kreu i LSI fliste për përqindje dhe ndarje pazaresh, si dhe për gjëra të tjera.
Prokuroria e atëhershme, e drejtuar nga Ina Rama i kërkoi Parlamentit të hetonte Metën që ishte dorëhequr nga posti i Zv.kryeministrit por ishte deputet.
Meta vetë kërkoi të hetohet dhe u bëri thirrje deputetëve të kërkonte heqjen e imunitetit, pasi atëherë nuk mund të nisnin hetimet ndaj një deputeti pasi kishte imunitet, e sot nuk e ka një të tillë asnjë zyrtar shteti. Por Meta e mohoi se ishte zëri i tij që kishte kërkuar 7% duke thënë se videoja ishte e montuar.
Parlamenti e dha “ok”-jin vetëm për heqjen e imunitetit. Prokuroria më pas kërkoi nga Gjykata e Lartë që të niste procedurat hetimore.
Si provë paraprake nxori video-regjistrimin e famshëm.
Pas kërkesës së prokurorisë, mbahet mend darka e famshme në shtëpinë e Ilir Metës me Kryeministrin e atëhershëm Sali Berisha, që u mor si mbështetje politike e aleatit të tij.
Gjykata e Lartë, anëtarë të së cilës ishin edhe me konflikt interesi, kërkuan që video-regjistrimi i plotë të çertifikohej nga ekspertë. Prokuroria e Përgjithshme me ndihmën edhe të ambasadës amerikane solli një ekspert nga SHBA që ishte i njohur pasi përdorej nga FBI dhe gjykatat amerikane për të çertifikuar materialet audiovizive.
Gjykata e Lartë nuk e mori për bazë kërkesën e Ina Ramës dhe nuk e pranoi ekspertin amerikan.
Ajo zgjodhi tre ekspertë të tjerë, njëri ndër të cilëve inxhinier elektronik por kushëri i parë i Genc Pollos.
Të tjerët ishin diplomuar në Universitetin Kristal. E përbashkëta e të treve ishte se ata ishin nëpunës të shtetit dhe jo të pavarur. Në fund, këta ekspertë vendosën se video-regjistrimi ishte i montuar.
Pas kësaj Gjykata e Lartë vendosi që të pezullojë hetimin për Ilir Metën dhe Prokuroria ishte e detyruar të mbyllte dosjen. Kështu përfundoi e gjitha ajo çështje dhe kreu i LSI-së me votat e të gjithë gjyqtarëve të Gjykatës së Lartë minus njërit, doli i pafajshëm.
Në rastin e Saimir Tahirit, Prokuroria mund ta kishte hetuar ish-ministrin pa pasur asnjë problem. Saimir Tahiri që në vitin 2014 e la mandatin e deputetit.
Me Kushtetutën e Republikës, ministri dhe deputeti nuk ka imunitet për t’u hetuar.
Megjithatë, Saimir Tahiri, që nga muaji mars 2017 nuk është as deputet dhe as ministër. Pra Prokuroria ishte e lirë ta hetonte, t’i bënte kontroll banese, ta përgjonte, ta arrestonte ish-ministrin dhe të çonte dosjen në gjykatë.
Nuk e bëri. Kjo ndodh vetëm sot kur Tahiri është deputet dhe Prokuroria menjëherë kërkon arrestimin e tij i cili nuk u zgjodh në qeverinë “Rama 2”.
Adriatik Llalla është në fundin e mandatit të tij si Kryeprokuror dhe muajin tjetër duhet të largohet. Po ashtu, e gjithë armata e Prokurorëve të Krimeve të Rënda do të duhet të dalin në vetting, ndërkohë vetë institucioni shkrihet dhe zëvendësohet nga SPAK apo Prokuroria Speciale.
Që do të thotë se nuk do të jenë këta prokurorë që të hetojnë dosjen Tahiri. Nëse do të duhej një hetim i plotë i çështjes, mjafton të kopsitet dosja dhe të dorëzohet në gjykatë, e nëse ka prova nuk ka si të bllokohet asgjë. Aq më shumë që një nga personat e përfshirë, Moisi Habilaj ndodhet tani i arrestuar në Itali. /tesheshi.com/
