Zgjedhja e anëtarit të shtatë të Gjykatës Kushtetuese, një grua, nuk ka qenë si e gjashtë të tjerëve të tanishëm, pa asnjë kontestim. Sonila Bejtaj, një emër i ardhur nga KED dhe që u dekretua menjëherë nga presidenti Meta, aludohet të jetë pikërisht njeriu më simbol i qëndrimeve të qarta politike që pritet të jetë në pozicionet e saj në çështje të nxehta që priten për shqyrtim, ku veçon ajo e legjitimitetit të zgjedhjeve 30 qershorit, si dhe e legjitimitetit të parlamentit aktual, të mbështetura të dyja nga ndërkombëtarët.
Jo vetëm nga fakti se Sonila Bejtja është bashkëshorte e Andi Bejtjas, kolona kryesore e informacionit e një televizioni të njohur pranë opozitës PD-LSI, porse publikisht ka mbrojtur qëndrimet e Metës vitet e fundit, duke qenë, në disa dalje mediatike, një zë avokator i opozitës në qasjet juridike të ngërçeve politike, provokuar nga bojkotet.
Pos kësaj, po publikisht, ajo ka kontestuar procesin e vettingut dhe përgjithësisht Reformën në Drejtësi. Në këtë frymë, është e vetmja që ka goditur dhe ndëkombëtarin me të njohur të vettingut, njeriun që monitoron çdo rast të kalimit në këtë proces, Theo Jacobs.
Pra, kjo është diferenca e këtij emri të ri në Kushtetuese, në raport me 6 të tjerët para saj: që vetëm Sonila Bejtja pra ka dalë me qëndrime publike pro frymës PD-LSI-Meta. Megjithatë, ndërkombëtarët në Tiranë përshëndetën zgjedhjen e saj, jo si person konkret por si anëtare e re e Kushtetueses në funksion të ngritjes së plotë të saj. Nuk ka reaguar ndërkohë as mazhoranca për këtë rast flagrant. Flagrant nga fakti se një anëtari i Kushtetuesës së re i dihet që më parë se ç’qëndrime politike ka.
Anëtarët e tjerë të Kushtetueses, mund të kenë dhe ata qëndrime politike, si njerëz që janë, por publikisht, me shprehjen e tyre, askush nga ata nuk ngjan me rastin Bejtja. /tesheshi.com/
