Dorëheqja e Nasip Naços nuk ishte një “rrufe në qiell të pastër” e aleancës qeverisëse PS-LSI.
Prej fundit të verës, koalicioni mes Edi Ramës dhe Ilir Metës ka marrë një të çarë të madhe nga prishja e marrëdhënieve direkte. Nga Meta, diçka tregohej, kurse Edi Rama e mohonte aq fort, sa kuptohej se duhet marrë e kundërta.
Me shpërthimin e aferës CEZ, ku del emri i Ilir Metës si pjesë e mundshme e marrjes së rrushfeteve, relacionet mes kryeministrit dhe kreut të Kuvendit morën një rrjedhë përmbytëse.
Ilir Meta kalon në kundërsulm duke kërkuar largimin e Saimir Tahirit dhe Damian Gjiknurit, të cilët i cilëson si fajtorë të shpërthimit të dosjes.
Rama nuk pranoi dhe Meta përgjigjet duke përdorur 20 deputetët e LSI-së, madje edhe 5 parlamentarët e PDIU-së, kreu i së cilës Shpëtim Idrizi duket se është në një linjë me kreun e Kuvendit.
Rama kundërpërgjigjet edhe më fort: në emisionin Top Story shpërthen duke theksuar se në Hipoteka ka një korrupsion masiv, institucion i drejtuar nga LSI.
Zhvillohen dy takime te vila e Mehmet Shehut ku Meta kërkon ndryshime, kurse Rama e pret aleatin e tij me ministrat që ai ka kërkuar të largojë. Pas kësaj ka ndodhur dorëheqja e sotme.
E cila sipas burimeve në qeveri ka edhe një prapaskenë tjetër, që ka të bëjë me çështje ekstra politike. Por që i takojnë një zhvillimi tjetër…
/tesheshi.com/
