Kryeministri shqiptar, Edi Rama ka nisur tashmë vizitën e tij zyrtare në Shtetet e Bashkuara të Amerikës, e cila pritet të jetë më e rëndësishmja e tij, gjatë 3 viteve në krye të qeverisë shqiptare.
Gjithçka është mbajtur në sekret të plotë, si nga pala shqiptare por edhe ajo amerikane, ndërkohë siç pritet, nesër kreu i qeverisë shqiptare do të jetë në Shtëpinë e Bardhë, ku i konfirmuar është takimi me Zv.Presidentin e SHBA-së, Joe Biden, ndërsa pritet që të ketë edhe një audiencë nga Presidenti Barack Obama në zyrën Ovale, por gjithçka po mbahet sekret.
Megjithatë, një problem i ka dalë rrugës Edi Ramës, ndërkohë që ende nuk ka shkelur ende në Uashington.
Partia Demokratike i ka hapur dosjen e muxhahidinëve iranianë, duke nxjerrë në publik diçka që është mbajtur sekret nga të dy palët, pas vizitës së Sekretarit të Shtetit të SHBA-së, John Kerry, i cili ishte në Tiranë me 14 shkurt.
Ish-ministri i Brendshëm, Flamur Noka, ka publikuar një letër, sipas të cilës i kërkohet Edi Ramës një interpelancë e posaçme parlamentare për opozitarët e Iranit që kanë mbërritur në Shqipëri.
Noka thotë se kërkon nga Rama informacion se sa pjesëtarë të muxhahidinëve janë dërguar në Francë me “dokumente udhëtimi”, pra pasaporta shqiptare.
Rrjedhja e këtij informacioni pritet që të diskutohet jo pa kujdes në Uashington, ndërkohë që ende nuk kanë ardhur pjesa më e madhe e opozitarëve iranianë, nga “Kampi i Lirisë” në Irak.
Burime diplomatike i thanë tesheshi.com se kjo është një çështje shumë e rëndësishme, por që nuk pritet të dalë në publik.
Gjatë vizitës së John Kerry-t në Tiranë, Kryeministri Rama, deklaroi se “nuk është folur fare për muxhahidinët” duke marrë përsipër kështu një problem, pasi në fakt ishte biseduar, por jo për publikun.
Vetë mohimi i vendosur i Ramës u lexua si një “pohim diplomatik”.
Ndërkaq, edhe Sekretary Kerry, gjatë takimit me kreun e opozitës Lulzim Basha, mësohet se ka folur për këtë çështje. Por vetë Basha nuk e nxori publikisht, por kur u pyet, tha se opozita është dakord për mbështetjen humanitare të iranianëve, madje shtoi se kjo gjë ka nisur që prej qeverisë “Berisha”.
Por ç’ka ndodhur sot? Pikërisht ditën që Rama ka nisur vizitën në SHBA, Flamur Noka ka depozituar shkresën që thekson në pikën dy: “Nëse kanë aplikuar apo fituar statusin e refugjatit disa prej tyre, me çfarë dokumenti udhëtimi kanë shkuar në Francë ku janë vendosur në kampin e ngritur atje?”.
Pikërisht kjo pikë pritet të hapë telashe për Ramën edhe në SHBA dhe Francë, pasi kancelaritë e këtyre vendeve po merren në rrugë operative për operacionin humanitar.
Një burim diplomatik i tha tesheshi.com se në Shtëpinë e Bardhë është përgatitur një konferencë për shtyp me Kryeministrin Edi Rama.
Dhe një hapje e çështjes së muxhahidinëve pritet që ta zhvendosë vëmendjen e axhendës politike të relacioneve Tiranë-Uashington, në një çështje me peshë globale si ajo e iranianëve.
Siç mësohet, e gjitha kjo është përgatitur nga “një mjeshtër i diplomacisë në selinë blu”, pikërisht për të ulur peshën e rëndë nga aspekti i imazhit që mund të sjellë vizita e Edi Ramës në Shtëpinë e Bardhë.
Nëse Kryeministri shqiptar, si “usta” në imazh ka përgatitur një mizanskenë turbulente, opozita ka ndërhyrë për t’i prishur atmosferën.
Fundja, siç duhet edhe kjo është politikë….
/tesheshi.com/
